«Զվարթնոց» օդանավակայանի հին համալիրի էստակադան ապամոնտաժելու քաղաքապետի թույլտվությունն արդեն տրված է, իսկ շենքի հեղինակ ճարտարապետներից Արթուր Թարխանյանի դուստր, «Զվարթնոց» օդանավակայանի հեղինակային իրավունքի իրավատեր, ճարտարապետ Անահիտ Թարխանյանն ահազանգում է.որոշումը տրվել է առանց նախագծային փաստաթղթերի:

Ավելին, մի խումբ ճարտարապետներ բարձրաձայնում են՝ իրականում շենքը ոչ միայն վթարային չէ, այլև այսօրվա նորմաներին է բավարարում:

Անհանգստացած են նաև մշակույթի գործիչները. «Լսել եմ՝ ապամոնտաժելու են: Սիրստ ցավում է, որոշել են՝ քանդում են: Նկատե՞լ եք, ինչ ուզում են քանդել՝ ասում են սեյսմիկ անկայունություն: Մեջբերում եմ ճարտարապետների խոսքը՝ 80 տոկոսով բարեկարգ վիճակում է «Զվարթնոցը»,-լրագրողների հետ հանդիպման ժամանակ ասաց քանդակագործ Լևոն Թոքմաջյանը:

Քանդակագործի խոսքով՝ Հին Երևանից ոչինչ չի մնացել. «Աբսուրդ է, Հին Երևանը քանդում են, որ Հին Երևան կառուցեն: Էլիտար կոչվող շենքերին եմ նայում, մեջը ոչ հոգի կա, ոչ կյանք: Ամեն ինչի իմաստը փոխվել է: Եկեղեցիներ են կառուցում՝ համերգային դահլիճների նման: Այնինչ, եկեղեցին պետք է գողտրիկ լինի, որ մտնես ու իրոք Աստծու հետ խոսես»,-նկատեց Լևոն Թոքմաջյանը:

Նկարիչ Հաղթանակ Շահումյանն էլ, շարունակելով վերջինին՝ ասաց.

«Բաներ կան, որ չենք գնահատում ու ժամանակի ընթացքում նոր գիտակցում ենք, թե ինչ ենք կորցրել: Պատմությունը պետք չէ ջնջել, քաղաքի կենսագրությունն այդպես հեշտությամբ պետք չէ ոչնչացնել: Դրականը անհրաժեշտ է պահպանել»: 

Անի Կարապետյան