Երեւանի տիկնիկային թատրոնի գեղարվեստական ղեկավար Ռուբեն Բաբայանն անցած երկու շաբաթում հասկացել է, որ ատելությունը շատ է:
«Մարդիկ իրար չեն հավատում, բայց հաղթանակի կարող ենք հասնել միայն իրար սիրելով, ձեռք-ձեռքի տալով, կոնկրետ գաղափար ունենալով»,-ասում է նա ու հավելում.
«Մեզ մոտ բոլորը խոսում են հայրենասիրությունից: Ուզում եմ հարց տալ՝ դուք կգերադասեք գնալ մասնագե՞տ, թե՞ հայերնասեր վիրաբույժի մոտ: Հայրենասիրությունը մասնագիտություն մի՛ դարձրեք: Եկե՛ք նայենք մեր քաղաքական դաշտը: 1-2 հոգի է, որ առաջընթաց է ապրել, մնացածը նույն մակարդակի են: Հնարավոր չէ անցյալ դարի մտածելակերպով մնալ, ոչինչ չփոխել ու դա սկզբունքայնություն համարել: Դա կյանքն ու ժամանակաշրջանն ընկալելու բացակայությունն է»:
Նրա կարծիքով՝ իշխանափոխություն անպայման պետք է լինի.
Իշխանափոխություն կատարվում է ոչ միայն այն պատճառով, որ իշխանությունը լավ կամ վատ է, այլ դա պարտադիր է, քանի որ ճահճանում է: Սա աքսիոմ է, որը մեր իշխանությունը չի հասկանում»,-նշեց Ռուբեն Բաբայանը:
Ինչ վերաբերում է Սերժ Սարգսյանի ելույթին՝ Տիկնիկային թատրոնի գեղարվեստական ղեկավարը նկատեց.
Երեկ նախագահն ասաց, որ Երևանը չպետք է դարձնել Բեյրութ ու Հալեպ: Ես շատ կցանկանայի, որ թույլ չտայինք Սյունիքի մարզը դարձնել Հյուսիսային Կորեա, Հայաստանն էլ՝ Կրասնոդարի երկրամաս»:
Անի Կարապետյան
