Սամվել Կարապետյանի կալանքը 2 ամսով երկարաձգվեց: «Դատարանը գտել է, որ առաջադրված մեղադրանքներից հիմնավոր կասկած առկա է միայն կոչի վերաբերյալ մեղադրանքում։ Իսկ մյուս մեղադրանքներում արձանագրվել է, որ դրանցում բացակայում է հիմնավոր կասկածը»,- դատարանի բակում լրագրողներին հայտնեց նրա փաստաբանը։
Կալանքի երկարաձգման որոշումը կայացրել է Հակակոռուպցիոն դատարանի դատավոր Տիգրան Դավթյանը:
Փաստաբանի խոսքով, Կարապետյանի կալանքի հիմք է հանդիսացել հնարավոր փախուստն ու քննությանը խոչընդոտելը:
Հիշեցնենք՝ Կարապետյանը կալանավորված էր հունիսի 18-ից՝ ՀՀ սահմանադրությամբ չնախատեսված եղանակով ՀՀ կառավարության լիազորություններին տիրանալուն ուղղված հրապարակային կոչի մեղադրանքով։ Ավելի ուշ նրան նոր մեղադրանք է առաջադրվել՝ փողերի լվացում ու հարկերից խուսափում։

***

Սամվել Կարապետյանի պաշտպանության խորհրդի հայտարարությունը․ «Հակակոռուպցիոն դատարանի այսօրվա անտրամաբանական վճիռը ցույց տվեց, որ Հայաստանում արդարադատություն չկա։ Բայց մենք անպայման վերականգնելու ենք այն։ Դատավորները ազատ են լինելու իրենց մասնագիտական գործունեությունն իրականացնելու մեջ ու չեն առաջնորդվելու վախով, այլ՝ բացառապես օրենքներով։
Շնորհակալություն ենք հայտնում երեկվա հավաքի հազարավոր մասնակիցներին ու մեր բոլոր աջակիցներին, որոնք դատարանի բակում էին կամ հետևում էին իրադարձություններին հեռավար։
Ամեն դեպքում, մեր բոլոր ծրագրերը ուժի մեջ են մնում։ Օգոստոսի վերջին կմեկնարկի Սամվել Կարապետյանի «Մեր ձևով» շարժումը, որի գործունեությունը, անկասկած, նոր, վաղուց սպասված էջ է բացելու մեր երկրի պատմության մեջ»։

Դիտեք նաև՝