Ադրբեջանի նախագահ Իլհամ Ալիևը այսօր՝ հունիսի 26-ին հայտարարել է, որ Ադրբեջանը պատրաստ է չճանաչված Լեռնային Ղարաբաղի Հանրապետության տարածքում ոչնչացնել Հայաստանի բոլոր ռազմական և մարտավարական օբյեկտները։
«Մենք ցանկանում ենք հակամարտության խաղաղ կարգավորում, սակայն գրավյալ հողերի հետ մենք չենք համակերպվի։ Հակառակորդը պետք է հասկանա, որ չկա այնպիսի ռազմական կամ մարտավարական օբյեկտ, որը չկարողանա վերացնել ադրբեջանական բանակը»,– հայտարարել է նա՝ երկրի զինված ուժերի 100-ամյակին նվիրված ռազմական շքերթի ժամանակ։
«Լեռնային Ղարաբաղը Ադրբեջանի հողն է։ Ադրբեջանցիները հարյուրավոր տարիներ ապրել և ստեղծել են այս տարածքի վրա։ Մենք ապրում ենք պատերազմի պայմաններում։ Ադրբեջանը չի համակերպվի իր գրավյալ տարածքների հետ և կվերականգնի տարածքային ամբողջականությունը»,– ընդգծել է Ալիևը։
Ադրբեջանի նախագահը նշել է, որ «գրավյալ տարածքների ազատագրման համար» Բաքվին ուժեղ բանակ և ուժեղ տնտեսություն է անհրաժեշտ։ «2013 թվականից ի վեր մենք մեծացրել ենք մեր պաշտպանական ծախսերը 15 անգամ»,– ասել է նա։
«Հայաստանը չի կարողանում և չի կարողանա մեզ հետ մրցակցել։ Պատմական արդարությունը մեր կողմն է, մենք ունենք ռազմական և տնտեսական հզորություն, և Ադրբեջանի ու Հայաստանի միջև անդունդը միայն ավելի է մեծանալու»,– նշել է Ալիևը։
«Պատերազմը դեռ չի ավարտվել։ Ավարտվել է միայն դրա առաջին փուլը»,– եզրափակել է Ալիևը։
Հիշեցնենք, որ երեկ Նիկոլ Փաշինյանն իր ֆեյսբուքյան ուղիղ եթերի ժամանակ ասել է.
«Չեմ կարող ասել, որ ունենք աննախադեպ իրավիճակ, ունենք սովորական ծանոթ իրավիճակ: Արձանագրենք, որ կոնֆլիկտը լուծված չէ, կիսապատերազմական վիճակ է, որը ցանկացած պահին կարող է փոխվել: Դա չի նշանակում, որ պետք է շեղվենք բնականոն կյանքից: Չեմ ուզում ասել` անհանգստանալու կարիք կա, չեմ ուզում ասել` անհանգստանալու կարիք չկա, ամեն ինչ այնպես է ինչպես գիտենք: Աշխատում ենք ԶՈՒ-ում մարտական ոգին ու պատրաստականությունը բարձրացնելու վրա: Աննախադեպ իրավիճակ չունենք, վիճակը աննախադեպ է` հարաբերական հանդարտության առումով»:
Կարդացեք նաև՝ Կան ադրբեջանական զորքերի կուտակումներ, սակայն իրավիճակը աննախադեպ չէ. Նիկոլ Փաշինյան
