Առաքելական Սուրբ Եկեղեցու Սյունյաց թեմի առաջնորդ Գերաշնորհ Տ. Մակար եպիսկոպոս Հակոբյանի գրառումը․ «Մեծ ցավով և մտահոգությամբ լսեցինք մայիսի 29-ին ՀՀ կառավարության նիստում վարչապետի հնչեցրած այն արտահայտությունը, ըստ որի՝ մեր եկեղեցիները «չուլանացված» են։ Այս խոսքը ոչ միայն անտեղի ու խիստ անհաջող համեմատություն է, այլև վիրավորական ու անհարգալից բնորոշում՝ ուղղված մի կառույցի, որը դարերի ընթացքում եղել է մեր ժողովրդի հոգևոր լույսն ու ազգային տոկունության աղբյուրը։
Երբ նման խոսքը հնչում է պետության ղեկավարի շուրթերից, այն կորցնում է կենցաղային բնույթն ու դառնում է արժեքային ազդակ, որը ցավալիորեն նսեմացնում է այն հարգանքը, որ դարեր շարունակ վայելել է Եկեղեցին՝ որպես համազգային սրբություն: «Չուլան» կոչել եկեղեցիները նշանակում է նսեմացնել մի սրբություն, որը տևականորեն սնուցել է մեր ժողովրդի հոգևոր կյանքը պատերազմներում, գաղթերի մեջ, ճնշումների օրոք։ Այդպիսի բառապաշարը ծառայում է հանրային գիտակցության մեջ սրբազան երևույթների արժեզրկմանը, հոգևոր դաշտի ապասրբայնացմանը, ինչը չի կարող անարձագանք մնալ։
Հարկ է նաև ընդգծել՝ սա պարզապես լեզվական վրիպում չէ։ Երբ երկրի ղեկավարը խոսում է եկեղեցու մասին նման բառապաշարով, նա անուղղակիորեն խաթարում է պետություն-եկեղեցի փոխադարձ հարգանքի հիմնախարիսխը և վտանգում հասարակության հոգևոր հավասարակշռությունը։
Որպես Սյունյաց թեմի առաջնորդ՝ վստահեցնում եմ վարչապետին (եթե, իհարկե, վարչապետի ասածը վերաբերում է Սյունյաց թեմի որևէ եկեղեցու), որ մեր եկեղեցական կյանքը ոչ միայն չի «չուլանանում», այլև, ընդհակառակը, հոգևոր զարթոնք է ապրում։ Սյունյաց վանքերն ու եկեղեցիները վերանորոգվում են, աղոթատները կենդանի են՝ լի հավատացյալներով, պատարագներին մասնակցությունն օրեցօր աճում է, իսկ հոգևորականները անխոնջ կերպով ծառայում են իրենց սուրբ առաքելությանը։ Կրթական, երիտասարդական և բարեգործական ծրագրերը նոր շունչ են հաղորդում համայնքային կյանքին, հատկապես՝ մեր սահմանամերձ բնակավայրերում։
Ինչ վերաբերում է վարչապետի ակնարկին՝ իբր մեր եկեղեցիներում մահճակալներ կան, պարզապես չի համապատասխանում իրականությանը։ Սյունյաց թեմի որևէ եկեղեցում երբևէ մահճակալ չի եղել։ Մեր սրբավայրերը բացառապես աղոթքի և հոգևոր ներկայության վայրեր են։
Վերջապես, եթե որևէ մեկին թվում է, թե եկեղեցիներն ամայի են կամ անտեսված, ապա միգուցե արժե ներհայեցողաբար հարցնել՝ ինչ ենք արել մենք՝ որպես իշխանավորներ, քաղաքացիներ և հավատացյալներ՝ մեր հոգևոր տներն արժանապատվորեն պահպանելու և կենդանի պահելու համար։
Եկեղեցին երբեք շքեղության վայր չի եղել, բայց միշտ եղել է հավատքի, մխիթարության և ազգային հավաքականության սուրբ օթևան։ Եվ այդ օթևանը երբեք չի կարող «չուլան» դառնալ, քանի դեռ նրա պատերը ամրացած են հավատավոր ժողովրդի սրտերում»։

***

Պատմաբան, խմբագիր Վահե Սարգսյանի ֆեյսբուքյան գրառումը. «Պատկերացրեք՝ դուք, որ ամեն մեկդ մեկ-երկու ինստիտուտ եք ավարտել, գիտությամբ, քաղաքականությամբ եք զբաղվում, ուզում եմ ասել՝ դատողություն ունեք, վաղուց հասկացել եք ամեն ինչ ու գիտեք, թե դա ինչ կարգի այլասերված է, բայց միևնույն է՝ ենթագիտակցորեն չհավատացիք ու գնացիք էջը ստուգեցիք (ես էլ):
Գիտեք, չէ՞, որ հասարակ ու բարիք ստեղծող հարյուր հազարավոր հայ մարդիկ՝ հողագործ, բանվոր, շինարար, խոհարար և այլն, իրենք էլ չեն հավատում, որ Արցախը դա է հանձնել, որ ծառայում է թուրք-ադրբեջանական շահերին, որ դավաճան է, որ իրենց ստրկացնելու է շուտով և այլն: Միևնույն է՝ ենթագիտակցորեն չեն հավատում:
Ինձ թվում է՝ էն վերացած ազգերն էլ են էսպես ազնիվ ու միամիտ եղել»։

Հասարակական-քաղաքական գործիչ Էդգար Ղազարյանի ֆեյսբուքյան գրառումը․ «Հայ ժողովրդի դեմ պատերազմի գերագույն հրամանտարն ու հրամանատարուհին արդեն բացահայտված են։
Այդ հրամանատարներն արդեն հաղթել են հայ ժողովրդին Արցախյան ճակատամարտում, Սյունիքի մի շարք հատվածներում, Ջերմուկի լեռներում, Գեղարքունիքի բարձունքներում, Տավուշի չորս գյուղերում։
Մարտեը շարունակվում են հայ ժողովրդի պատմության, լեզվի, մշակույթի, կրթության, հավատքի, եկեղեցու, ընտանիքի և այլ արժեքների դեմ»։

***

Վերլուծաբան Արա Արայանի ֆեյսբուքյան գրառումը․ «Նիկոլենց 2026-ի ընտրությունների ստրատեգիան պարզ է:
Աջ ու ձախ չնայել, թքած ունենալ էթիկայի ու բարոյականության վրա, հասարակությանը բաժանել ու բևեռացնել ցանկացած մեթոդներով: Գաղափարական միտք չի հնչելու, միայն հայհոյանք ու բամբասանք՝ տգետ զանգվածներին ականջահաճո:
Որ քաղաքական ուժը այս կերպ պատասխանեց ու լեզվակռվի մեջ մտավ նիկոլենց հետ, այդ ուժն է նիկոլենց դաշնակից՝ սպառինգ պարտնյորը, այդ ուժը գործելու է պետության դեմ:
Հիշեք՝ ովքեր Հայ ժողովրդին որևէ կերպ բաժանում ու լարում են միմյանց դեմ, դրանք են դրսից ներդրված լրտես դավաճանները: Մեզ միայն խոհեմություն ու համերաշխություն է անհրաժեշտ, մենք ահռելի ներուժով, գլոբալ ազգ ու ժողովուրդ ենք: Երբ միասնական ենք, մեզ հաղթել հնարավոր չէ: Մեր պատմությունը դրա վառ ապացույցն է, այն միասնության պատմություն է, հակառակ դեպքում Հայ ժողովրդը դեռևս մի քանի դար առաջ սպառված ու վերացած կլիներ:
Այս խայտառակությունից պետք է դուրս գանք, ամոթ է, մեր երկիրը վերածել են ախոռի»։

ՀՀ ԱԺ «Հայաստան» խմբակցության պատգամավոր Լիլիթ Գալստյանի ֆեյսբուքյան գրառումը․ «Այս զույգի գործունեությանը կարելի է տարբեր գնահատականներ տալ, վերջիններիս հոգեբանական, հոգեկան և բարոյական առողջության ակնհայտ վատթարացման վերաբերյալ եզրակացությունների հանգել, անգամ տոգորվել հումանիզմով և ՀՀ բյուջեի հաշվին հարկադիր բուժման ուղարկել կամ՝ վերջիններիս հանրային վտանգավորությունը հաշվի առնելով, գխավոր դատախազի և գլխավոր հոգեբուժի միջնորդությամբ մեկուսացնել, բայց միթե՞ սա է ողջ իրականությունը։
Նա ընտրված է և ընտրված է հենց այս առաքելության համար․․․ սա հատուկ սելեկցիա է՝ նախընտրական սրացումներով, որն ընթանում է ու սրվում արտաքին մարտահրավերները դիմադրելու վերջինիս անկարողությանը զուգահեռ։
Այդ առաքելության անունը հայ ժողովրդի տրանսֆորմացիա է, քաոսացում, չգոյություն։ Այդ պատկերը կարող եք գտնել այդ զույգի հին տան պատին․ հայտնի հաղորդումից շատերդ կհիշեք․․․Հիմա Հայաստանն այդ պատն է․․․ ներսից և դրսից անարգվող․․․
1700 ամյա Հայ Առաքելական եկեղեցին այդ խզբզողներից և խզբզանքներից չի թուլանում և չի թուլանա։ 17 տարից էլ երկար ձգվող նրա ճանապարհին հերձվածողներ, ԳԻՇԱՆԳՂԻ ԲԱՐՔՈՎ հալածողներ շատ են եղել․․․
Բայց Հայաստանյայց Հայ Առաքելական Եկեղեցին ինքը հայ ժողովուրդն է՝ ՄԵՆՔ, մեր ներսի պատը։ Եվ խնդիրը մեզ՝ մեր ամբողջության մեջ քաոսացնելն է, մեր ներսի ու դրսի պատերը, մեր հավաքական /construct-ը/ ողնահարը քանդելն է։
Այսօր թիրախավորված են, և հետևողականորեն փորձ է արվում կազմաքանդել այդ պատը պահողներին, եկեղեցուն, դաշնակցությանը, մեր ազգային իմունիտետը պահող քաղաքական ուժերին և անհատներին։ Ցավոք․ շատերի մտածումներում արդեն քանդված պատեր են, արժեհամակարգային քաոս, որն էլի հատուկ է ծրագրավորված․․․
Պահել ՊԵՏԱԿԱՆՈՒԹՅՈՒՆԸ․ կասեցնել մեր ներքին պատերի փլզումը, չթողնել, որ նաև ներքին թշնամին քանդի մեր պատը․ ՍԱ Է ԽՆԴԻՐԸ․․․