Լրագրող Նարեկ Կիրակոսյանի ֆեյսբուքյան գրառումը․ ««Տիկտոկ»-ում մեմ է դարձել մի տեսարան, որտեղ կինը լացելով ապտակում է իրեն։ Մեկ, երկու, երեք... Նույնատիպ վիդեոներ նայելուց հետո որոշեցի պարզել, թե որտեղից է այդ կտորը։ Պարզվեց՝ հանրային մուլտիպլեքսով հեռարձակվող ալիքներից մեկի սերիալներից է։
200+ սերիա արդեն տեղադրված է, մի քանիսը հետ ու առաջ անելով նայեցի և եկա այն եզրակացության, որ արտադրվում է մի կոնտենտ, որտեղ կնոջ կերպարը մշտապես ստորացված է ներկայացվում։ Սերիալը «Յութուբ»-ում նայում է կես միլիոնից ավելի մարդ, և կես միլիոն մարդ տեսնում է, որ ընտանիքի գրեթե բոլոր անդամների կողմից կնոջը կարելի է ստորացնել։
Սա նայում են տարբեր մտածելակերպ ունեցող մարդիկ, ու չգիտես՝ նրանց մոտ ինչ ընկալում է ձևավորվում կնոջ հանդեպ։ Անցումային շրջանում գտնվողի համար նման բովանդակությունը դառնում է վարքագծի ցուցիչ․ կարծես նորմալ է կնոջ, մոր հետ այսպես վարվելը։ Իսկ չմոռանանք, որ մեր հասարակությունում դեռ խոր արմատներ ունեն այն մոտեցումները, թե կինը երկրորդական դեր ունի, հատկապես՝ Երևանից դուրս։
Ամենաանհանգստացնողն այն է, որ Հայաստանում հեռուստաարտադրանքի որակի վերահսկող որևէ արդյունավետ մարմին չկա։ Հեռուստատեսության և ռադիոյի հանձնաժողովի նախագահն ասում է՝ աշխատուժը սահմանափակ է, մոնիթորինգը՝ մասնակի։ Ստացվում է բաց դաշտ․ ով ինչ ուզում, նկարում է, ինչ ազդեցություն ուզում՝ թողնում է, միայն թե իշխանությանը չկպնի։
Սա արդեն լուրջ խնդիր է։ Բռնության ու նվաստացման տեսարաններին պետք է վերջ տալ, գոնե հանրային մուլտիպլեքսի եթերից։ Բայց քանի որ այս թեման ոչ «Շողակաթ» է, ոչ Գարեգին Բ-ի ուղերձ, դժվար թե իշխանությունից օրենսդրական նախաձեռնություն լինի»։