«Մեր ձևով» շարժման համակարգող Նարեկ Կարապետյանը հաշվետու ժողովի ժամանակ հայտարարեց, որ շարժմանն արդեն 5000 կամավոր է միացել։ «Ամեն օր հարյուրավոր մարդիկ զանգահարում են, համացանցային կապ են հաստատում ու միանում են մեզ՝ առաջարկելով կամավորականություն, որպեսզի երկրում հնարավոր լինի կատարել այն փոփոխությունները, ինչն իրենք են տեսնում և ինչը բոլորս ենք տեսնում։ Համախոհների այս տեմպը եթե շարունակվի, վստահ ենք՝ մոտակա ամիսներին արդեն կլինենք տասնյակ հազարավոր»,- նշել է նա։

***

«Մեր յուրաքանչյուր քաղաքական ուժ, որը հավակնում է լինել երկրի ղեկավար, հարց լուծել երկրում, պետք է մի բան անի՝ իշխանությունը վերցնելուց հետո էդ փառքի մեջ արխային չընկնի։ Պետք է ամեն օր մի ոտ ավելի արագ լինել, քան հարևանները»,- հաշվետու ժողովի ժամանակ հայտարարել է «Մեր ձևով» շարժման համակարգող Նարեկ Կարապետյանը։ Նրա խոսքով՝ այսքան տաղանդ ունեցող ազգին լավ ուղղորդում է պետք։

***

Ինչո՞ւ են «նախկինների» հետ ասոցացվող որոշ քաղաքական դեմքեր հայտնվել Սամվել Կարապետյանի թիմում, չէ՞ որ ասել էին` ՀՀ երկրորդ և երրորդ նախագահներ Ռոբերտ Քոչարյանի և Սերժ Սարգսյանի հետ «Մեր ձևով» շարժումը չի համագործակցի։

«Մենք հայտարարել ենք ձեր թվարկած ուժերի հետ նախընտրական որևէ միավորման չգնալու մասին, բայց չենք ասել, որ այդ ուժերի որևէ ներկայացուցչի հետ չենք գնա։ Ձեր նշած իրավիճակը այս պահին չկա, բայց մենք պատրաստ ենք շատ ուժերի հետ աշխատել և պրոֆեսիոնալներին ներգրավել մեր թիմ։ Յուրաքանչյուր պրոֆեսիանալ, որն ունի մեծ փորձ և մաքուր ձեռքեր, կարող է միանալ մեզ»,–պատասխանեց շարժման համակարգող Նարեկ Կարապետյանը։

***

«Վարչապետի թեկնածուի հետ կապված՝ ասել ենք, որ կներկայացնենք քաղաքական ուժի ստեղծման հայտարարության ժամանակ։ Հասարակությանը վստահեցնում ենք, որ թեկնածուն կլինի ընդունելի ու շատերը կհավանեն նրա թեկնածությունը»,- ասուլիսի ժամանակ ասաց «Մեր ձևով» շարժման համակարգող Նարեկ Կարապետյանը՝ անդրադառնալով վարչապետի թեկնածուի մասին լրագրողի հարցին։