ՀՀ ԱԳՆ մամուլի խոսնակ Աննա Նաղդալյանն այսօր ճեպազրուցի ընթացքում անդրադարձել է Լեռնային Ղարաբաղի հակամարտության կարգավորման հարցին և Ադրբեջանի այն հայտարարությանը, ըստ որի՝ բարենպաստ իրավիճակ է ստեղծվել հակամարտության կարգավորման համար:
«Այս առնչությամբ պետք է արձանագրեմ, որ մենք բազմիցս ենք հայտարարել բանակցային գործընթացի համար բարենպաստ միջավայր ստեղծելու մասին: Բազմիցս նշել ենք, թե այդ միջավայրի կոմպոնենտները որոնք են, որ պետք է կատարվեն վստահության մեխանիզմների ներդրման վերաբերյալ նախկինում ձեռքբերված պայմանավորվածությունները, որ պետք է հրաժարվել ռազմական հռետորաբանությունից և ժողովուրդների թշնամանքի քարոզումից: Ոգևորիչ չէի ասի, բայց լավ է, որ նման հայտարարություն է հնչում Ադրբեջանի կողմից, քանի որ սա առաջին անգամ է, որ նման բան է արվում»,- ասել է Ա. Նաղդալյանը:
Ինչ վերաբերում է Բելառուսի նախագահ Ալեքսանդր Լուկաշենկոյի՝ Ադրբեջանին Ռուսաստանի կողմից զենք վաճառելու մասին հայտարարությանը, Աննա Նաղդալյանը նշեց, որ Բելառուսի նախագահի հայտարարություններին անդրադարձել են վարչապետի պաշտոնակատարը և նրա խոսնակը:
«ԱԳՆ-ի կողմից կարող եմ հավելել, որ տարածաշրջանում սպառազինությունների մրցավազքը մշտապես եղել է մեր օրակարգում: Դրա մասին նաև ԱԳՆ ղեկավարը բարձրաձայնել է ԵԱՀԿ նախարարական համաժողովի ժամանակ՝ նշելով, որ սպառնալիքների նվազեցման միջոցները պետք է առաջնային նշանակություն ունենան նաև ԵԱՀԿ մասնակից երկրների քաղաքականությունում»,- հայտարարել է ԱԳՆ խոսնակը:
