«Կախված չլինելով» Մաքսիմ Հակոբյանից՝ այդուհանդերձ ամեն գնով պաշտպանում ենք՝ ընդհուպ մինչև անտրամաբանական միտք հայտնելով։
Այսօր սննդամթերքի անվտանգության պետական ծառայությունում տեղի էր ունենում մամուլի ասուլիս, որտեղ թվում էր, թե կպարզվի՝ ի վերջո ինչն էր հանդիսացել Մաքսիմ Հակոբյանին պատկանող սպանդանոցում գրանցված բրուցելոզի պատճառը: Սակայն պարզվում է, որ մեր երկրում կան չինովնիկներ, ովքեր դեռ վստահ չեն, որ հիվանդները վարակվել են սպանդանոցում: Գյուղնախարարության «Անասնաբուժասանիտարիայի, սննդամթերքի անվտանգության և բուսասանիտարիայի ոլորտի ծառայությունների կենտրոն» ՊՈԱԿ-ի տնօրեն Արմեն Ավագյանը ներկաներին փորձում էր համոզել, որ հնարավոր է՝ սպանդանոցի 19 աշխատողներ բոլորն առանձին-առանձին վարակվել են իրենց կամ հարևանների տներում, բայց ոչ սպանդանոցում: Հանուն Մաքսիմ Հակոբյանի չինովնիկը պատրաստ էր անգամ նման կարծիք հայտնել՝ երկրորդ պլան մղելով, որ հիվանդները սպանդանոցի աշխատակիցներ են, որ իրականացրել են կենդանու մորթ, և որ հենց մորթի ընթացքում վարակվելն ամենահավանականն է: Դա ընդամենը փորձ էր ուշադրությունը շեղել սպանդանոցից:
Այսքանից հետո, կարծում եմ, պարզ է, թե որքանով կապ ունի Մաքսիմ Հակոբյանը գործի բացահայտման դանդաղ ընթացքի հետ:
Հ.Գ.
Հատկանշական է, որ չինովնիկներից մեկը նշեց, որ գրանցված դեպքը եղել է սպանդանոցի վատ մենեջմենթի արդյունք, աշխատողներին լավ չեն ներկայացրել՝ ինչպես աշխատել:
Տպավորություն է ստեղծվում, որ հենց համակարգի ներսում մի մասը կախված է Մաքսիմ Հակոբյանից, մյուսը՝ ոչ: Հուսանք, որ գոնե համակարգի ներսում ի վերջո խնդիրը կլուծվի: Սակայն այս դեպքում էլ հնարավոր է 2 դեպք. կամ բոլորով կդառնան անկախ, կամ բոլորով՝ կախված Մաքսիմ Հակոբյանից: Իսկ եթե բոլորով դառնան կախված, կպարզվի, որ մարդիկ վարակվել են իրենց տներում: 
Հուսանք, որ կլինի հակառակը, և ի վերջո կբացահայտվեն հիվանդության գրանցման իրական պատճառներն ու մեղավորները:

Էդգար Խաչատրյան