ՀՀ արտաքին գործերի նախարար Զոհրաբ Մնացականյանը և ՀՀ տրանսպորտի, կապի և տեղեկատվական տեխնոլոգիաների նախարար Հակոբ Արշակյանը «Ինժեներական քաղաքում» մայիսի 3-ին հանդիպեցին հայկական ծագմամբ բարձր տեխնոլոգիական արտադրության շուրջ 60 ընկերությունների ներկայացուցիչների հետ:

Հանդիպման հիմնական թեման վերաբերում էր դեպի միջազգային շուկաներ բարձր տեխնոլոգիական արտադրության արտահանմանը, միջազգային հարթակում համագործակցության արդյունավետ գործիքների մշակմանը, նպատակների և ոլորտների հստակեցմանը, միջազգային շուկա մուտք գործելու իրավական ընթացակարգերին և մի շարք այլ հարցերի:

Հակոբ Արշակյանը հատկանշական համարեց, որ հանդիպումը տեղի է ունենում «Ինժեներական քաղաք»-ի տարածքում, քանի որ այս տարի ամռանն այստեղ սկսվելու է «Ինժեներական քաղաք»-ի շինարարությունը, որը հնարավորություն կտա մեկտեղել տեխնոլոգիական ներուժը: Արդյունքում ընկերությունները հնարավորություն կունենան ավելի սերտ համագործակցելու, ինչպես նաև օգտագործելու բարձր տեխնոլոգիաների ոլորտում ՀՀ կառավարության ընձեռած հնարավորությունները։

Նախարար Արշակյանը նշեց, որ բարձր տեխնոլոգիաների ոլորտը ՀՀ կառավարության հիմնական առաջնահերթությունն է: Անդրադառնալով եղած հնարավորություններին և ներուժին՝ Հակոբ Արշակյանն ընդգծեց, որ տեխնոլոգիական աշխարհում այլևս սահմանները ջնջված են, և համագործակցության արդյունքում է, որ լայնամասշտաբ խնդիրներ են լուծվում։ Խոսելով անցկացվող հանդիպման նպատակի մասին՝ տրանսպորտի, կապի և տեղեկատվական տեխնոլոգիաների նախարար նշեց, որ պետք է հստակ ձևակերպվի տեխնոլոգիական համայնքի պահանջարկը՝ ի՞նչ գործիքակազմով է հնարավոր միջազգային համագործակցության հարթակներ դուրս գալ, հասկանալ՝ ո՞րն է արդյունավետ համագործակցությունը և առաջ գնալ։

Իր խոսքում նախարար Մնացականյանն ընդգծեց, որ նորարարությունների, բարձր տեխնոլոգիաների ոլորտի զարգացման օրակարգը Հայաստանի արտաքին քաղաքական գերակայություններից է։ Նրա խոսքով՝ երկկողմ և բազմակողմ ձևաչափերում առկա են բազմաթիվ հնարավորություններ ձևավորելու համապատասխան հարթակներ՝ տեխնոլոգիական ոլորտի մասնավոր ընկերությունների կարողությունները մեր միջազգային գործընկերներին ներկայացնելու և համագործակցության նոր հեռանկարներ ուղենշելու համար։

Զոհրաբ Մնացականյանը շեշտեց, որ տեխնոլոգիական ոլորտի մասնավոր հատվածը բավական կազմակերպված ու համախմբված է, կարող է հանդես գալ միասնական մոտեցումներով՝ հնարավորություն տալով հստակեցնելու մեր ընդհանուր նպատակները։

Հանդիպման ընթացքում ծավալված ակտիվ քննարկման ընթացքում բարձրացվեցին մի շարք խնդիրներ, որոնց տրվեցին պարզաբանումներ, մի շարք հարցերի շուրջ հստակեցվեցին մոտեցումները, արդյունավետ գործունեության հնարավորությունները։ Պայմանավորվածություն ձեռք բերվեց, որ նման հանդիպումները շարունակական բնույթ կունենան։

ԱԳ նախարար Զոհրաբ Մնացականյանի ճեպազրույցը լրագրողների հետ «Ինժեներական քաղաք» այցի ժամանակ

Հարց: Ի՞նչ ակնկալիքներ ունեք այս քննարկումից:

Զոհրաբ Մնացականյան: Առաջին հերթին շատ շնորհակալ եմ, որ իմ գործընկեր Հակոբ Արշակյանի հետ շատ հստակ ձևավորել ենք այս ձևաչափը, որը իրապես շատ էական է. մենք ներկայացնում ենք կառավարությունը, մենք որպես կառավարություն ունենք մեր պատասխանատվությունը՝ ձևավորելու միջավայրը, ձևավորելու հարթակը, որտեղ մեր մասնավոր հատվածը կարող է ավելի արդյունավետ աշխատել: Մենք իրենց համար կարող ենք նոր հնարավորություններ ստեղծել: Բայց մենք, բնականաբար, չենք կարող իրենց փոխարեն որոշումներ ընդունել, որովհետև իրենց պահանջների հիման վրա է, որ մենք ուղենշում ենք, թե ինչպես կարող ենք օգտակար լինել և ինչ նոր հարթակներ կարող ենք ստեղծել՝ իրենց հնարավորությունների ձևաչափերն ընդլայնելու համար: Այսօրվա մեր գործառույթը դա է:

Կառավարությունը, որպես ծառայություն մատուցող և աջակից մեր մասնավոր հատվածին, կկարողանա ավելի հստակեցնել, այսպես ասած, պատվերները, պահանջները, սպասելիքները, ակնկալիքները, ծրագրերը, որպեսզի մենք համադրված կերպով միասին կարողանանք ձևակերպել, թե ինչ որակյալ ծառայություն կարող եք ներկայացնել: Այդ առումով, վստահ եմ՝ լսել եք նախկինում, որ նորարարությունների, բարձր տեխնոլոգիաների և խելացի զարգացման օրակարգը մեզ համար չափազանց էական արտաքին քաղաքական գերակայություն է: Մենք ունենք բազմաթիվ հնարավորություններ բազմակողմ և երկկողմ ձևաչափերում ձևավորելու հարթակներ, որտեղ մեր մասնավոր հատվածը կարող է օգտագործել այդ հարթակները միջազգային համագործակցության առումով իրենց կարողությունները զարգացնելու համար, իրենց նպատակներին դա ծառայացնելու համար:

Այնպես, ինչպես որ դա եղավ մեր Եթովպիա և Ռուանդա այցի ժամանակ, որտեղ կան հսկայական հետաքրքիր հնարավորություններ մեր մասնավոր հատվածի համար, որը աշխատում է այս խելացի օրակարգի շուրջ: Այդ առումով է, որ պարոն Արշակյանի հետ շատ սերտ համագործակցության շնորհիվ կարողացանք կազմակերպել մասնավոր սեկտորի ներգրավումը: Մենք չէինք որոշել, թե ով պետք է գա, ինչ պետք է անի. որոշումը իրենցն էր: Մենք օգտագործեցինք այդ առիթը և հնարավորություն ստեղծեցինք դռները բացելու և մուտք գործելու մեզ համար նոր տարածաշրջան և նոր հնարավորություններով բավական հարուստ երկու երկիր՝ Եթովպիա և Ռուանդա:

Այսօրվա մեր գործառույթը  վերաբերում է դրան: Մենք շատ ոգևորված ենք, որովհետև այդ շարունակական աշխատանքի միջոցով այսօր հանգել ենք մի ձևաչափին, որը կարող ենք հստակեցնել ավելի ընդլայնված այս հանդիպման ընթացքում: Սա շարունակական է, այս հանդիպումը վերջինը չէ, որի ժամանակ մենք հստակեցնում ենք պատվերը, որպեսզի որպես կառավարություն որակյալ ծառայություն մատուցենք մեր մասնավոր սեկտորին, որպեսզի շատ թիրախավորված կերպով օգտակար լինենք մեր մասնավոր հատվածին:

Կան առանձին ընկերություններ, որոնք շատ լավ համախմբված են տարբեր միությունների, տարբեր ձևաչափերի մեջ, որի միջոցով կարող են արտահայտել միասնական դիրքորոշում, միասնական մոտեցումներ, որն ավելի որակյալ է դարձնում իրենց պատգամը, իրենց սպասելիքների և ակնկալիքների ձևակերպումը: Դա մեզ համար շատ օգտակար է, այն ավելի գործնական և պրակտիկ ձևով հնարավորություն է տալիս հստակեցնել այդ նպատակները, որի շուրջ մենք պետք է աշխատենք։