Բագրատ Սրբազանի փաստաբան Հովհաննես Խուդոյանը «Սրբազան պայքար»-ի գործով ներգրավված հանրային մեղադրողներին բացարկ է ներկայացրել։

Բացարկին միացավ նաև ԱԺ պատգամավոր Արթուր Սարգսյանը, ում խոսքով հանրային մեղադրողներն իրականացնում են քաղաքական պատվեր․ «Իրենք են որոշել իրենց ճանապարհը, պարգևատրվել են «Մխիթար Գոշ» շքանշանով, վարչության պետ են դարձել․․․ Անգամ կնոջ կալանավորեցին, որից հետո չեմ հասկանում, թե ինչպե՞ս են նայել իրենց կանանց աչքերին։ Այն ժամանակ կամք չեն ունեցել պատվեր իջեցնողներին ընդդիմանան, մեզ մեր ընտանիքներից զրկել են, բայց գոնե հիմա կամք ունենան, ինքնաբացարկ հայտնեն, գնան»,- ասաց Սարգսյանը՝ հիշեցնելով․ «Ռոբերտ Քոչարյանին և Սերժ Սարգսյանին մեղադրող քննիչը, որը ևս ստացել էր «Մխիթար Գոշ» շքանշան, հիմա գտնվում է Վարդաշեն ՔԿՀ-ում»։

***

ԱԺ «Պատիվ ունեմ» խմբակցության քարտուղար Տիգրան Աբրահամյանի ֆեյսբուքյան գրառումը․ ««Սրբազան շարժման» գործով դատական նիստն է, որտեղ փաստաբանները հետևողականորեն «ջարդում» են ինչպես գործի տակ դրված կեղծ դրվագները, այնպես էլ իշխանության դաշտ նետած քարոզչական հորինվածքները:
Դատավորն ու դատախազներն անշուշտ այդ ամենը լավ գիտեն, սակայն ստիպված լսում են ապօրինությունների այն մանրամասները, որոնք փաստաբաններն իրավական առումով գրագետ և ուսուցողական տոնով նրանց են հրամցնում:
Դատախազները ագրեսիվ կեցվածքով փորձում են դիմադրել մի բանի, որի շանսը պարզապես չունեն, իսկ այս գործում իրենց մասնակցությունը դեռ խորը հետք կթողնի վերջիններիս մասնագիտական կյանքում` անկախ նրանից, թե հիմա այդ մասին գիտակցո՞ւմ են, թե՞ ոչ»:

Հիշեցնենք՝ Հովհաննես Խուդոյանը վարույթով ներգրավված բոլոր հինգ հանրային մեղադրողներին բացարկ հայտնեց։ Միջնորդությանը միացան բոլոր պաշտպանները։ Խուդոյանը պարզաբանեց, որ բացարկի հիմքում ընկած է հայտնի ձայնագրությունը, որտեղ, ըստ վարույթի նյութերի, զրուցում են Բագրատ Սրբազան ու Հովհաննես Ավետիսյանը։ Խուդոյանի խոսքով՝ քրեական վարույթի նյութերում առկա է «ակնհայտ կեղծիք»։

«Երկխոսության առանձին հատված դուրս է բերված արձանագրությունից՝ քննարկման բովանդակությունն այլ համատեքստում ներկայացնելու համար»,- նշել է փաստաբանը։ Նա ներկայացրել է խոսակցության բովանդակությունը՝ պնդելով, որ այն ամբողջությամբ հակասում է վարույթի նյութերում առկա սղագրությանը։

Բագրատ Սրբազանը ևս հայտարարեց, որ մեղադրողները «մեղադրող չեն, այլ՝ զրպարտող»։
Հանրային մեղադրողները սակայն առարկեցին բացարկի միջնորդությանը։