Հայաստանի երիտասարդ իրավաբանների ասոցիացիայի ուշադրության կենտրոնում է գտնվում փաստաբան Արշավիր Խալափյանի նկատմամբ իրականացվող դատավարությունը:
Հայաստանի երիտասարդ իրավաբանների ասոցիացիան իր խորին մտահոգությունն է հայտնում փաստաբան Արշավիր Խալափյանի նկատմամբ իրականացվող դատավարության կապակցությամբ:
Մտահոգության համար առիթ են հանդիսանում իրականացվող վարույթի ընթացքում թույլ տրված մի շարք խախտումներ, որոնց կապակցությամբ ևս Հայաստանի երիտասարդ իրավաբանների ասոցիացիան հանդես է եկել հայտարարությամբ:
Գտնում ենք, որ Ա. Խալափյանի արարքում բացակայում են հանցագործության հատկանիշներ, արարքը իրենից հանրային վտանգավորություն չի ներկայացնում: Ավելին, արարքը, որը վերագրվում է Ա. Խալափյանին` հերքվում է նրա իսկ վստահորդների հայտարարությամբ, որում վստահորդները իրենց գոհունակությունն են հայտնում փաստաբան Արշավիր Խալափյանի աշխատանքից, ցանկանում են, որ նա շարունակի իրենց իրավունքների պաշտպանությունը:
Վերը նշված փաստերի համադրումը, ինչպես նաև այն հանգամանքը, որ մեղադրող դատախազը պահանջում է որպես պատիժ կիրառել ազատազրկում երկու տարի ժամկետով, այն պարագայում երբ կարող էր պահանջել, օրինակ` տուգանք, ինչպես նաև քաջատեղյակ լինելով Ա. Խալափյանի կողմից իրականացված իրավապաշտպան գործունեությանը, այդ գործունեության ընթացքում նրա կողմից վարած գործերի հնչեղությանը, աչքի առջև ունենալով Ա. Խալափյանի` որպես համարձակ ու արհեստավարժ փաստաբանի կերպարը` կարծում ենք, որ Ա. Խալափյանի նկատմամբ սկսված և ընթացող գործընթացը նպատակ է հետապնդում խոչընդոտելու նրա մասնագիտական գործունեությանը:
Հայաստանի երիտասարդ իրավաբանների ասոցիացիան ակնկալում է, որ Ա. Խալափյանի վերաբերյալ գործը քննող դատարանը կգտնվի իր բարձունքում և գործը կքննի արդարության բոլոր պահանջների պահպանմամբ`որպես անկախ և անկողմնակալ դատարան:
Հայաստանի երիտասարդ իրավաբանների ասոցիացիայի վարչություն
