Հայաստանի արդարադատության նախարարության Դատական ակտերի հարկադիր կատարման ծառայության ղեկավար, արդարադատության գնդապետ Միհրան Պողոսյանի անունն այսօր Արդարադատության նախարարի ամփոփիչ մամլո ասուլիսում ամենաշատը հնչեց: Լրագրողները նախ անդրադարձան նրա՝ բիզնես գործունեության մասին շրջանառվող լուրերին.
«Ես որեւէ մեկին, լինի դա ԴԱՀԿ ղեկավարը, թե արդարադատության նախարարության որեւէ պաշտոնյա, ես նրանց կենսագրությամբ չեմ զբաղվում: Դրա համար կա եկամուտների հայտարարագիր, և իհարկե, Միհրան Պողոսյանը, ում պետք է դիմեք այդ հարցով»,-նկատեց Արփինե Հովհաննիսյանը:
Անդրադարձ եղավ նաև տարվա ընթացքում բազմիցս հնչած դժգոհություններին՝ հաշիվների արգելանքի հետ կապված. «Հարկադիր կատարման ծառայությունը յուրահատուկ կարգավիճակում է գտնվում: Աշխարհի ոչ մի երկրում օրինական հարկադրանք կիրառող մարմնից որևէ մեկը երբեք գոհ չէ:
Օրինակ, երբ դատարանը կիրառում է հայցի ապահովման միջոց, որևէ անգամ չի զանգահարում ու զգուշացնում, որովհետև պատկերացրեք մի իրավիճակ, որ դատարանը զգուշացնի հակառակ կողմին, ու ասենք ասի, որ նրա մեքենան ագելանքի տակ է դրվելու, ի՞նչ եք կարծում, 2 օրվա ընթացքում հնարավոր չէ՞ր լինի դա օտարել ու խուսափել հայցի ապահովման միջոցից: Ինչ վերաբերում է արգելանքներին, ապա մի քանի ծրագրային խնդիրներ կային, որոնք միայն հարկադիր կատարման ոլորտում չէին: Այժմ այնպես է դարձվել համակարգը, որ հարկադիր կատարման որևէ ծառայող չկարողանա միջամտել և արգելանք դնել: Հարկադրանքը կիրառվում է ծանուցման դեպքում»:
Անի Կարապետյան
