Հանրապետության նախագահ Արմեն Սարգսյանն այսօր հյուրընկալել է Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսին:
Նախագահն ու Վեհափառ Հայրապետն քննարկել են մեր երկրի ապագային, պետություն-եկեղեցի հարաբերություններին և ազգային-եկեղեցական կյանքի խնդիրներին առնչվող հարցեր: Նրանք խոսել են նաև հայրենիք-սփյուռք կապերի մասին, կարևորել դրանց առավել սերտացումը, ինչը հնարավորություն կտա ավելի միասնաբար դիմակայել առկա մարտահրավերներին:
Պաշտոնական ևս մեկ լուր՝ նախագահի աշխատակազմից.
Արմեն Սարգսյանն այսօր ընդունել է Հայկական Կարմիր խաչի ընկերության նախագահ Մխիթար Մնացականյանին և ընկերության գլխավոր քարտուղար Աննա Եղիազարյանին:
Հյուրերը նախագահ Սարգսյանին համառոտ ներկայացրել են Հայկական Կարմիր խաչի գործունեության ուղղություններն ու ծրագրերը: Նշելով, որ իրենց հիմնական գործընկերները տարբեր երկրների ազգային նմանատիպ կառույցներն են, որոնց աջակցությամբ բազմաբնույթ ծրագրեր են իրականացվում, Մխիթար Մնացականյանն ասել է, որ Հայկական Կարմիր խաչի ընկերությունն արդեն 30 տարի հաջողությամբ համագործակցում է մասնավորապես Գերմանական Կարմիր խաչի հետ:
Գերմանիա իր առաջիկա պաշտոնական այցի ընթացքում Հանրապետության նախագահը հյուրընկալվելու է Գերմանական Կարմիր խաչին: Նախագահ Սարգսյանը նշել է, որ Գերմանական Կարմիր խաչի՝ հատկապես վերջին 30 տարիների գործունեությունը Հայաստանում վկայությունն է այն բանի, որ մարդասիրությունը սահմաններ չունի:
