Ի՞նչ է կատարվում Մայր Աթոռում. Ինֆորմացիան և տեսանյութերն այս հղումով թարմացվում են․ Հետևեք նաև Asekose.am-ի տելեգրամյան ալիքին։
Նոյեմբերի 28-ին Մայր Աթոռ Սուրբ Էջմիածնում, նախագահությամբ Ն․Ս․Օ․Տ․Տ․ Գարեգին Երկրորդ Ամենայն Հայոց Կաթողիկոսի, նախատեսված էր Գերագույն հոգևոր խորհրդի հայաստանաբնակ անդամների ժողով, որի իրավազոր նիստը հնարավոր չեղավ գումարել Տ․ Նավասարդ արք․ Կճոյանի, Տ․ Աբրահամ արք․ Մկրտչյանի, Տ․ Վազգեն արք․ Միրզախանյանի, Տ․ Վրթանես եպս․ Աբրահամյանի, Տ․ Գևորգ եպս․ Սարոյանի բացակայության պատճառով։ Հայտնում են Մայր Աթոռից։
Այնուամենայնիվ ներկա ժողովականները մասնավոր անդրադարձ ունեցան նոյեմբերի 27-ին ինը եպիսկոպոսների ստորագրությամբ հրապարակված հայտարարությանը։ Արձանագրվեց, որ հիշյալ շարադրանքն ամբողջապես խեղաթյուրված է ներկայացնում Տ․ Արշակ արք․ Խաչատրյանի խնդրով ստեղծված հանձնախմբի աշխատանքը։ Հանձնախումբը, ըստ էության, որևէ նիստ չի գումարել և անգամ հնարավորություն չի ընձեռել Արշակ Սրբազանին հանդիպելու իր հետ, իսկ Ամենայն Հայոց Կաթողիկոսին ներկայացված հանձնախմբի անդամների եզրակացությունը պատշաճ ընթացակարգով չի կազմվել։ Նշվեց նաև, որ հանձնախմբի կողմից որևէ պաշտոնական դիմում չի կատարվել Քննչական կոմիտե Սրբազանին վերագրվող տեսանյութի փորձաքննության համար, իսկ հանձնախմբի առանձին անդամի կողմից ստացված եզրակացությունը ձեռք է բերվել օրենքի ակնհայտ խախտումով, սպառիչ և լիարժեք չէ և չի կարող արժանահավատ հիմք ծառայել, որով և չէր կարող ընդունելի նկատվել Հայոց Հովվապետի կողմից։ Տեղեկացվեց նաև, որ նոյեմբերի 24-ին հանձախմբի ատենապետ Տ․ Խաժակ արք․ Պարսամյանը, հաշվի առնելով առկա հանձնախմբի արդյունավետ աշխատելու դժվարությունները, գրություն է ուղղել Վեհափառ Հայրապետին՝ առաջարկելով հարցի արդար քննության իրականացման համար ձևավորել երեք անձից կազմված նոր հանձնախումբ, որը կարող է նաև քննարկել Սրբազանի ծառայության առժամյա կասեցման հարցը մինչ հանձնաժողովի աշխատանքների ավարտը։ Նոր հանձնախմբի առաջարկի վերաբերյալ նոյեմբերի 25-ին իրազեկվել են և համաձայնություն տվել գործող հանձնախմբի անդամները։
Այսու, ակնհայտ է, որ հայտարարության մեջ Ամենայն Հայոց Կաթողիկոսի հասցեին հնչեցվող մեղադրանքները բացարձակ անհիմն են և շինծու, Սրբազանի անձի թիրախավորումը ու կանխակալ կարծիքների ձևավորումը՝ անթույլատրելի։
Դատապարտելի և անընդունելի համարելով որդեգրված սույն կեցվածքը՝ ժողովականները խիստ հրամայական նկատեցին, որ եկեղեցականները վերադառնան կանոնական դաշտ՝ իրենց մտահոգություններն արծարծելով Եկեղեցու բարձրագույն ժողովական մարմիններում, և չխաթարեն Եկեղեցու միաբանությունը։
***
Հայ առաքելական եկեղեցին սովոր է փորձությունների, և դրանք մշտապես ավարտվել են եկեղեցու հաղթանակով, եկեղեցու հարատևությամբ. տեր Փառեն
«Միշտ էլ գայթակղություններ, փորձություններ եղել են, որովհետև չարը երբեք չի հանգստանում։ Մենք մեր որդիական խոնարհումն ենք բերում Վեհափառ հայրապետին, Արագածոտնի թեմի հոգևորականներով այսօր Մայր աթոռ ուղտի ենք եկել, որպեսզի, եթե հնարավոր լինի, մոտենանք, Վեհափառի աջը համբուրենք»,– ԱրմենիաSputnik–ի հետ զրույցում ասել է Սաղմոսավանքի հոգևոր հովիվ տեր Փառեն քահանա Առաքելյանը։
Նա որևէ գնահատական չտվեց երեկվա հոգևորականների` Փաշինյանի հետ հանդիպմանը` ասելով, որ ինքը պարզ քահանա եմ, և ինքը չէ, որ պիտի գնահատական տա սրբազանների արարքին։
***
Մայր աթոռում այս պահին միայն 1 ժողով է` Գերագույն հոգևոր խորհրդի ժողովը. Հայր Ասողիկ
«Ժողովը կվերջանա, ամեն ինչ կիմանանք»,–ասաց նա` նշելով, որ չգիտի` Փաշինյանի հետ հանդիպման գնացած 8 հոգևորականը մասնակցում են ժողովին, թե ոչ։
Մայր աթոռի այսօրվա վիճակը հայր Ասողիկը բնութագրեց «խաղաղ, աղոթական»։
***
|
«Վարդապետների ժողովում մեր մտահոգություններն ենք հայտնել եկեղեցու շուրջ ստեղծված իրավիճակի կապակցությամբ, բայց ինչ դիրքորոշումներ կլինեն՝ կարտահայտենք ավելի ուշ։ Իսկ Վեհարանի ժողովից տեղյակ չեմ»,- այսօր Մայր Աթոռում լրագրողների հետ զրույցում ասաց Հայր Անանիան։ Դիտարկմանը՝ թե ժողովում քննարկվել է երեկ վարչապետի հետ հանդիպած հոգևորականների կարգալուծության հարցը, Հայր Անանիան պատասխանեց․ «Քննարկումները, թե կարգալուծության հարց է քննարկվել, բացարձակ սուտ է, նույնիսկ մտքներիս ծայրով չի անցել և դա մեր իրավասություններից դուրս է»։ |
***
|
«Մայր Աթոռից ահազանգ ստացանք, որ վտանգներ են սպառնում եկեղեցուն, և որպես հավատացյալներ, ՀԱՍԵ հավատարիմ հետևորդներ, երեկոյան եկանք այստեղ, հանդիպեցինք միաբանների հետ, ստացանք Վեհափառի օրհնությունը։ Նրանք ասացին, որ եկեղեցին ունի իր զավակների կարիքը, որովհետև Նիկոլ Փաշինյանի կառավարությունը փորձում է ներսից քանդել եկեղեցին, գտնել այնպիսի մարդկանց, ովքեր ունեն խոցելի տեղեր, բայց պետք է նշեմ, որ 56 եպիսկոպոսներից ընդամենը 8-9 են գնացել են նրա հետ հանդիպման։ Հիմա Մայր Աթոռում միաբանների ժողով է, որտեղ քննարկվելու է այս ուրացող եպիսկոպոսներին կարգալույծ անելու հարցը»,- այսօր Մայր Աթոռի բակում լրագրողների հետ զրույցում ասել է Նաիրի Հոխիկյանը։ «Հնարավոր է, որ այսօր այս ուրացյալ եպիսկոպոսներն ընդհանուր հայտարարություն անեն՝ ընդեմ Մայր Աթոռի, Վեհափառի, փորձեն, այսպես ասած, ներքին հեղափոխության անել, նաև վտանգ կա, որոշ տեղեկատվություն կա, որ փորձ է արվելու Վեհափառին ձերբակալել, կալանավորել, մեկուսացնել»,- հավելել է Հոխիկյանը։ Դիտեք նաև՝ |
|
«Մենք մեկ ամիս շարունակ Ամենայն հայոց կաթողիկոսին ասել ենք, հորդորել ենք, որ Արշակ Սրբազանի հարցը պետք է լուծվի, սրբապղծություն է տեղի ունեցել։ Անգամ չենք ասել՝ թող կարգալույծ արվի, ասել ենք, որ եթե հնարավոր է որոշ ժամանակով՝ ասենք 5-6 ամսով, կասեցնել իր ծառայությունը, թող գնա, զղջա, ապաշխարհի, վերադառնա եկեղեցի»,- «Նյուզ»-ի հետ զրույցում ասել է Կոտայքի թեմի առաջնորդ Տեր Առաքել արքեպիսկոպոս Քարամյանը, ով ևս երեկ հանդիպել է վարչապետ Նիկոլ Փաշինյանին և ստորագրել է եպիսկոպոսների դիմումի տակ։ *** |
|
«Նիկոլ Փաշինյանն այսօր ասաց, որ կիրակ Երևանի Սուրբ Սարգիս եկեղեցում կմասնակցի պատարագի, երեկ էլ հանդիպել էր մի խումբ սրբազանների հետ: Փաշինյանը պատրաստվում է վերջնական փուլի՞ն՝ կաթողիկոսի հեռացմա՞նը»,- ԱԺ-ում, դիմելով Առողջապահության նախարար Անահիտ Ավանեսյանին, հարցրեց լրագրողը: Նախարարն ասաց՝ կիրակի դեռ պատրաստվում են մասնակցել պատարագի. «Շարունակելու ենք կիրակի օրերին գնալ պատարագի: Միանշանակ դրական ենք գնահատում մեր եպիսկոպոսների արձագանքը»: Հարցին՝ կաթողիկոսի թեկնածուի անուն քննարկո՞ւմ եք, Ավանեսյանն ասաց՝ «վայ, ժողովուրդ ջան, լավ էլի»: |
