Hraparak.am-ը գրում է. Ինչու՞ եք Ծառուկյանի կամ Սերժ Սարգսյանի նկատմամբ անվստահությամբ տրամադրվել: Որ չեք ասու՜մ՝ իրար ինչ ասես՝ ասին, հիմա էլ՝ մոռացած. միմյանց ջան- ջիգյար են ասում, զարմանում եմ: Յոթը եկեղեցի մուրազով շինած մարդը մեջը չարություն կունենա՞… Եկեղեցասիրությունը ուրիշ բան է:
Առաջ չէի հասկանում: Մի քանի տարի առաջ հոգևոր մի հզոր տեսանյութ էի նայում. մեկը, չգիտեմ ինչ ցեղից էր, կերել էր մի ծեր մարդու: Բեմում կանգնել ու համբուրվում էր իր կերած զոհի որդուն: Որդին էլ նրան էր համբուրում: Ահա թե ինչ է նշանակում ներողամտությունը: Բոլորը ողջունում ու ծափահարում էին: … Իսկ դուք այդքանն անտեսելով,«մաղձ եք թափում ու գաղջ մթնոլորտ ստեղծում» և զարմանում, որ «ախպերները բարիշում են»: Դուք ուրիշ բանի մասին մտածեք:
Ծառուկյանը յոթ եկեղեցի է շինել ու անցել սրբերի դասը և չի կարող անսահման բարությամբ չտրամադրվել իր քաղաքական ախոյանի հանդեպ: Իսկ Սերժ Սարգսյանը… Չէ, ինչքան մտածում եմ, ինքն էլ գոնե մի քանի եկեղեցի պիտի կառուցի, որ հավատանք՝ Գագո ախպորը էլ վտանգ չի սպառնում…
Հեղինակ` Հասմիկ Բաբաջանյան
Նյութը`սկզբնաղբյուր կայքում
