Երևանի Ջոն Կիրակոսյանի անվան թիվ 20 հիմնական դպրոցում կազմակերպվել էր Արցախյան պատերազմի ազատամարտիկ, ազատագրական շարժման գործիչ, գրող, դպրոցի նախկին աշակերտ Դավիթ Սարապյանի՝ Դևի 50-ամյակին նվիրված հուշ-երեկո: 

Միջոցառումն իրականացվել է Երևանի քաղաքապետարանի աջակցությամբ և ՀՀԿ Կենտրոն տարածքային կազմակերպության երիտասարդական խորհրդի նախաձեռնությամբ: 

Միջոցառման շրջանակում ներկաները նախ մեկ րոպե լռությամբ հարգել են ապրիլի սկզբին առաջնագծում զոհված զինծառայողների հիշատակը, որոնք, ինչպես և Դավիթ Սարապյանը, զոհվեցին հանուն հայրենիքի: 
 Երեկոյի ընթացքում երիտասարդներն ու դպրոցի աշակերտները ներկայացրել են Դևի կարճ, բայց հերոսական դրվագներով լեցուն կյանքի ճանապարհն ու թղթին հանձնված նրա այն մտքերը, որոնցով այսօր առաջնորդվում են դպրոցի աշակերտները: 

Միջոցառմանը ներկա են եղել Երևանի քաղաքապետարանի աշխատակազմի հանրակրթության վարչության պետն ու Կենտրոն վարչական շրջանի ղեկավարը, ինչպես նաև Դևի մարտական ընկերները: 
Հյուրերը ծանոթացել են նաև ուսուցիչների ջանքերով դպրոցում ձևավորված Դավիթ Սարապյանի հուշանկյունին: 
 Միջոցառումն ուղեկցվել է ազգային մարտական երգերով և ռազմապարերով:

Երևանի քաղաքապետարանի տեղեկատվության 
և հասարակայնության հետ կապերի վարչություն