Արևելքը գրում է.Հնդկաստանում հիշում են հնդկական արվեստի մեծ նվիրյալ, նշանավոր երգչուհի, պարուհի Գոհար Ջանին  (Գոհար Ջաան),  որի մահվան 85-ամյակը լրացավ այս տարի:  Գոհար Ջանը ապրել է Հնդկաստանում, բուռն ստեղծագործական կյանք է ունեցել 1900–1930 թվականներին, մահացել է 1935-ին:  Իր ժամանակների ամենափայլուն աստղը երգել է  հնդկական 20 բարբառներով:  Ծնունդով Կալկաթայից հայուհի Գոհար Ջանը Հնդկաստանի առաջին երգչուհին է, որը 20-րդ դարի սկզբին գրամոֆոնային ձայնասկավառակ է ձայնագրել: Նրա ձայնն այսօր պահպանվել է շնորհիվ  1902-ին ձայնագրված այդ սկավառակի: 

Մամուլը Գոհար Ջանին համարել է 20-րդ դարի սկզբի «Էլիզաբեթ Թեյլոր»: Նա նորաձեւության օրինակ էր ծառայում իր ժամանակի կանանց համար: Հայուհու անունը հիշատակվում է իբրեւ միակ արտիստուհին,  որը մոտ մեկ դար առաջ ելույթ է ունեցել այն միջոցառման ժամանակ, որը կազմակերպվել էր  երկրի մայրաքաղաքը Կալկաթայից Դելի տեղափոխվելու առթիվ:   Այն ժամանակներում նա իր մեկ ելույթի համար հազարավոր ռուպիներ էր վաստակում: Գոհար Ջանը Անգլիայի փոխարքայից հետո  Կալկաթայում երկրորդ մարդն էր, որ ավտոմեքենա ուներ:  Հնդկական կինոարդյունաբերության վաղ ժամանակներում նկարահանված ֆիլմերում հաճախ է օգտագործվել Գոհար Ջանի երգերը, պարերը, հագուստի եւ զարդեղենի ոճը:   Երգչուհի-պարուհին Հնդկաստանում ոչ պակաս նշանավոր երգչուհի Մալկա Ջան հայուհու դուստրն է:  

Գոհար Ջանի մասին նույնիսկ  գիրք է գրվել, որտեղ ներկայացված են նրա ամբողջ կյանքը,  ստեղծագործական ընթացքը եւ այն ժամանակը, որում հռչակվել է հայուհին: