Հինգ իրավապաշտպանների նախաձեռնությունը հայտնում է․ «Կեսօրից հետո Երևանում ու մի քանի մարզերում սկսել է «իրավապահների» տեռոր, որը հիշեցնում է 1915թ. ապրիլի 24-ի նախօրեն։ Ձերբակալվել, բերման են ենթարկվել, բաժին են «հրավիրվել» ընդդիմադիր հայացքներ ունեցող ու ամենատարբեր քաղաքական ուժեր ու խմբեր ներկայացնող մի քանի տասնյակ քաղաքացիներ»։

Փաշինյանի կեցավայրի մոտ շարունակում են ոստիկանական ուժեր կուտակվել Ընդդիմադիր ակտիվիստների և կուսակցականների ձերբակալությունների ֆոնին ՆԳՆ հաղորդեց, որ «հասարակական կարգի խաթարմանն ուղղված գործողությունների նախապատրաստման վերաբերյալ օպերատիվ տվյալներ են ստացել և կանխարգելիչ գործողություններ են ձեռնարկում»։ Իսկ Փաշինյանը Թուրքիայում է, ժամը 19։00–ի կհանդիպի Էրդողանի հետ։

***

«Սրբազան պայքար» թելեգրամյան ալիքը հայտարարություն է տարածել, որում ասված է․ «Հայտնում ենք, որ իրավապահ մարմիններն այս պահին իրականացնում են «Սրբազան պայքար»-ի կողմնակիցների լայնամասշտաբ ապօրինի ձերբակալություններ:

Քաղաքական հետապնդումների այս ալիքի պատճառը անհասկանալի է: Փաստենք, որ այն մեկնարկել է Փաշինյանի՝ Թուրքիայում գտնվելու պահին»:

Հասարակական կարգի խաթարմանն ուղղված գործողությունների նախապատրաստման վերաբերյալ ՆԳՆ ոստիկանությունում օպերատիվ տվյալներ են ստացվել, գրել է խոսնակ Նարեկ Սարգսյանը` ի պատասխան ձերբակալությունների մասին տարածված լուրերի։ 

«ՆԳՆ ոստիկանությունը իրականացնում է ուժեղացված ծառայություն, ինչի շրջանակում ձեռնարկվում են կանխարգելիչ-բացատրական աշխատանքներ։ Կոչ ենք անում պահպանել հասարակական կարգը։ Ցանկացած հակաօրինական դրսևորում արժանանալու է կոշտ հակազդման»,–սպառնացել են գերատեսչությունից։

***

Երգչուհի Լիլիթ Բլեյանի ֆեյսբուքյան գրառումը․ «Քանի որ խոսնակի մեկնաբանությունների բաժինը փակ է, էստեղ գրեմ, որ հասարակական կարգի գլխավոր խախտողը փախել է իրենց հսկողությունից, լքել է հանրապետության տարածքն ու այս պահին գտնվում է Ստամբուլում։ Ձեր գործողություննե՞րը»։

***

ԱԺ «Պատիվ ունեմ» խմբակցության քարտուղար Տիգրան Աբրահամյանի ֆեյսբուքյան գրառումը․ «ՆԳՆ-ն ասում է, որ մարդկանց զանգվածային բերման ենթարկվելը կապված է կանխարգելիչ-բացատրական աշխատանքների հետ:
Իսկ ո՞րն է դա. երևի բերետներից հավաքում են, մարդկանց քաշքշում, հրում, բռնություն գործադրում` համարում, որ «բացատրական-կանխարգելիչ» աշխատանքն արված է:
Թե բա` «ցանկացած հակաօրինական դրսևորում արժանանալու է կոշտ հակազդման», իսկ ավելի պարզ ասած, ով Փաշինյանի դիրքորոշումը չի կիսում ու դա ինչ-որ ձևով արտահայտում է, բերման կենթարկվի կամ կկալանավորվի»:

***

ՀՅԴ Հայաստանի Գերագույն մարմինը հայտնում է․ «Քիչ առաջ ապօրինի ձերբակալություններ և խուզարկություններ են իրականացվել ՀՅԴ մարզային կառույցների պատասխանատու ընկերների նկատմամբ։
ՀՅԴ անդամների նկատմամբ քաղաքական հետապնդումների այս նոր փուլը մեկնարկել է Փաշինյանի՝ Թուրքիայում կատարած այցին զուգահեռ։
Անկախ զարգացումներից և բռնաճնշումների ծավալներից փաստում ենք. որևէ բռնաճնշում չի կարող մեզ լռեցնել, այսպիսի գործելաոճն, ի վերջո, ծնելու է համարժեք հակազդեցություն»։