Անի համայնքի ղեկավար Արման Սարիբեկյանին և նրան ուղեկցող պատվիրակության անդամներին Սոֆիայի Վասիլ Լևսկի օդանավակայանում վերաբերվել են որպես փախստականների:
Այս մասին գրում է բուլղարական մամուլը՝ նշելով, որ սահմանապահ ոստիկանությունը նրանց տարել է ծառայողական շենք, մերկացրել, խուզարկել և երկու ու կես ժամ պահել։
Սկանդալի մասին հայտնել է Անի համայնքի քույր քաղաք՝ բուլղարական Նովի Պազարի քաղաքապետ Գեորգի Գեորգիևն ու մանրամասնել․
«Այս միջադեպը տեղի է ունեցել հոկտեմբերի 1-ին: Սակայն չորրորդ օրը ես դեռևս պաշտոնական պատասխան չունեմ բուլղարական իշխանություններից մեր հյուրերի նկատմամբ այս նվաստացուցիչ վարքագծի վերաբերյալ»։
Նշվում է, որ Սոֆիայում Հայաստանի դեսպան Ծովինար Համբարձումյանը նոտա է ուղարկել Բուլղարիայի արտաքին գործերի նախարար Գեորգ Գեորգիևին:
Բուլղարական մամուլը նաև գրում է, որ Անի համայնքի ղեկավարն ու պատվիրակության մյուս անդամները Շենգենյան վիզաներ ունեին Երևանում Բուլղարիայի դեսպանատնից և Նովի Պազարի քաղաքապետ Այան Մեհմեդովը նրանց սպասում էր օդանավակայանում։
Վայրէջքից անմիջապես հետո հայերին կանգնեցրել է սահմանային ոստիկանությունը, որը նրանց տարել է հարցաքննության սենյակ և խուզարկել։ Նովի Պազարի քաղաքապետը նշել է, որ նրանց ստիպել են մերկանալ։
Բացի այդ ՝ հայկական պատվիրակության ուղեբեռը, այդ թվում պաշտոնական նվերները մեծ մասամբ վնասել են։։
Նշվում է, որ շենքի ներսում ոստիկանությունը հայերին բազմիցս ասել է, որ նրանք համարվում են միգրանտներ, որոնք պետք է անմիջապես մեկնեն Ավստրիա։
Հայ հյուրերը փորձել են ոստիկանների հետ ռուսերեն խոսել, բայց նրանց պատասխանել են, որ լեզուն չեն հասկանում։
Հայկական պատվիրակությունը, այնուամենայնիվ, կարողացել է մասնակցել Նովի Պազարի տոնակատարություններին։
Նշենք, որ սա առաջին դեպքը չէ, երբ Երևանից ժամանող ինքնաթիռը հայերին վերաբերվում է որպես վտանգավոր միգրանտների։
Հավելենք, որ ըստ պաշտոնական հաղորդագրության, Բուլղարիայի Նովի Պազար քաղաքում աշխատանքային այցով գտնվող Շիրակի մարզի Անի համայնքի պատվիրակությունը՝ համայնքապետ Արման Սարիբեկյանի գլխավորությամբ, ստորագրել է համագործակցության համաձայնագիր, որով Անի համայնքը և Նովի Պազար քաղաքը դարձան քույր համայնքներ․ստորագրված փաստաթուղթը նախատեսում է համագործակցություն մի շարք ոլորտներում՝ մշակույթ, կրթություն, սպորտ, զբոսաշրջություն և տնտեսություն։
