Թուրքիայի նախագահ Ռեջեփ Թայիփ Էրդողանն Անկարայում ռուսաստանցի պաշտոնակից Վլադիմիր Պուտինի հետ հանդիպումից հետո հայտարարել էր, որ պաշտպանական ոլորտում 2 երկրների միջև կնքված S-400 հակաօդային պաշտպանության համակարգերի (ՀՕՊ) պայմանագրից բացի այլ պայմանագրեր ևս կարող են կնքվել:

«Հայաստանը, եթե Ռուսաստանի նման դաշնակից ունի, թշնամի այլևս պետք չէ: Հետևաբար, ինչ ասես կարելի է սպասել:  Ինչ վերաբերում է S-400-ին՝ բլեֆը վերածվեց իրականության։  Ինձ համար շատ բարդ էր հասկանալ, թե Թուրքիայի ինչի՞ն է պետք սա:  Այնքանով, որքանով կարող էր ԱՄՆ-ին ու ՆԱՏՕ-ին շանտաժի ենթարկել, ենթարկեց վերջացրեց։ Հիմա այս համակարգը չի ինտեգրվելու ՆԱՏՕ-ի ՀՕՊ ընդհանուր համակարգին, երկրորդ՝ 2.5 մլրդ դոլար փող պետք է ծախսի Թուրքիան սրա համար։ Երրորդ՝ սա լուրջ գործոն է՝ էապես վատթարացնելու հարաբերությունները Թուրքիայի և ՆԱՏՕ-ի իր դաշնակիցների միջև»,-լրագրողների հետ հանդիպման ժամանակ նման կարծիք հայտնեց «Քաղաքական և միջազգային հետազոտությունների կենտրոնի» փորձագետ Ռուբեն Մեհրաբյանը։