«Փաստինֆո»-ն գրում է.Կարեն Դեմիրճյանի անվան մարզահամերգային համալիրը վաճառվեց 30 մլն ԱՄՆ դոլարով և կվերածվի ժամանցի կենտրոնի: Այս մասին որոշումն այսօր ընդունվեց ՀՀ կառավարության նիստում: Նախագիծը ներկայացնող պաշտպանության նախարար Սեյրան Օհանյանը հայտնեց, որ համալիրն ուղղակի վաճառքի ձևով օտարվելու է «ՆՏԱԱ Ինվեստմենտ Գրուպ» ՍՊԸ-ին: Ի դեպ, այս ընկերության մասին ոչ միայն կառավարության որոշման մեջ, այլև ընդհանրապես որևէ տեղեկություն չկա:
ՀՀ կառավարության Էլեկտրոնային ռեգիստրի տվյալներով՝ այս ընկերությունն ընդամենը 24 օր առաջ է գրանցվել` հուլիսի 20-ին: Ընկերության հիմնադիրն է Արմեն Զավենի Գևորգյանը: ՄՀՀ-ը վաճառելու որոշման հետ կառավարությունը միաժամանակ նաև հավանություն տվեց ՆՏԱԱ Ինվեստմենտ Գրուպ -ի ներկայացրած ներդրումային ծրագրին, որի համաձայն, համալիրի տարածքը վերածվելու է «ընտանեկան ուղղվածության» կենտրոնի, որտեղ գործելու են հյուրանոցներ, փակ ջրաշխարհ, համերգային դահլիճներ, հանդիպումների սրահներ, ռեստորաններ, խանութներ և նույնիսկ խաղատուն:
Ծրագիրը նախատեսվում է իրականացնել առավելագույնը 4 տարվա ընթացքում: Այս մանեի իրականացման համար նոր սեփականատերը 100 մլն ԱՄՆ դոլարի ներդրում է խոստանում: Իսկ դրամական միջոցները ներգրավելու է օտարերկրյա պետություններից:
