Գյումրիում այսօր սկսել է միջազգային ճանաչված մրցանակակիր լուսանկարիչ-լրագրող, National Geographic և Time ամսագրերի աշխատակից Ջոն Ստենմայերի աշխատարանը (Storytelling & Social Media workshop by John Stanmeyer) որը տևելու է մինչև մարտի 12-ը: Ինչպես «Արևելքին» հայտնեցին 4Plus վավերագրական լուսանկարչական կենտրոնից (որ Գյումրիում Ջոն Ստենմայերի աշխատարանի աջակիցներից է), հեղինակավոր լուսանկարչի միջազգային աշխատարանին մասնակցում է 12 հոգի՝ տարբեր երկրներից:
Հայաստան են ժամանել ԱՄՆ-ից Իտալիայից, Պորտուգալիայից, Լեհաստանից, այլ երկրներից, իսկ աշխատարանի երկու մասնակից էլ ընտրվել է Հայաստանից (Քնար Բաբայան և Յուլիա Գրիգորյան): Հայ մասնակիցները, ինչպես տեղեկացրեց 4Plus-ի համահիմնադիր Անուշ Բաբաջանյանը, ընտրվել են մրցույթով և աշխատարանին մասնակցելու են անվճար:
Ամերիկացի լուսանկարիչը Գյումրին պատահական չի ընտրել: Անցյալ տարի, լինելով Հայաստանում, նա տեսել է, որ երկրի կյանքը հիմնականում կենտրոնացած է մայրաքաղաքում: Իր հերթական աշխատարանն անցկացնելով Գյումրիում՝ նա նպատակ է ունեցել ուշադրություն հրավիրել քաղաքի վրա:
Ջոն Ստենմայերի աշխատարանի մասնակցողներից յուրաքանչուրն ընտրել է մեկական թեմա, որոնց վրա Ջոն Ստենմայերի օգնությամբ աշխատելու է մեկ շաբաթվա ընթացքում: Թեմաները տարբեր են՝ կանանց իրավունքներից մինչև տեղական ավանդույթներ, տնակային պայմաններից մինչև լուսավոր Գյումրի: Առանձին անդրադարձներ են լինելու նաև կրոնին, խորհրդային տարիների հիշողություններին:
Լուսանկարչության գաղտնիքները փոխանցելուց բացի, Ջոն Ստենմայերը մասնակիցներին սովորեցնելու է լուսանկարչությունը սոցիալական մեդիայում տարածելու ժամանակակից հնարավորությունները:
Տեղեկացանք նաև, որ Ջոն Ստենմայերի՝ 2015-ի հայաստանյան այցի մասին լուսանկարչական ռեպորտաժն առաջիկա ապրիլին տպագրվելու է National Geographic-ում: Միջազգային լուսանկարչի հետ հանդիպելու հնարավորություն կունենան նաև Երևանում: Մարտի 16-ին և 18-ին նա երկու հանրային դասախոսություն է ունենալու «Ականաթում» և ՀԲԸՄ երևանյան կենտրոնում:
