«Իմ քայլը» խմբակցության պատգամավոր Անդրանիկ Քոչարյանն ԱԺ հայտարարությունների ժամի իր ելույթում անդրադարձավ կորոնավիրուսով պայմանավորված իրավիճակին եւ նշեց, որ հասարակական եւ քաղաքական կյանքն այժմ առավել, քան երբեւէ տեղափոխվել է վիրտուալ դաշտ։
«Որոշ հանրահայտ քաղաքական ուժեր ֆեյքերի միջոցով փորձում են ՀՀ-ում ձեւավորել կեղծ հանրային օրակարգ, որը որեւէ աղերս չունի իշխանության միակ կրողի՝ ժողովրդի հետ։ Ֆեյքերի միջոցով տպագրում են հոդվածներ, ֆեյքերը դրանց արձագանքում են, իսկ սպասարկող մամուլը արտատպում եւ ձեւավորում է հանրային ֆեյք կարծիք։ Հայրենիքի եւ զինվորի գաղափարը տեղափոխվում է ոչ իրական դաշտ, արդյունքում ունենում ենք կեղծված արժեհամակարգ»,- ասաց Քաչարյանը՝ հավելելով, որ իրական հայրենիքի, մարդու, զինվորի կերպարին զուգահեռ ծնվում է արհեստական իրողություն, սակայն այն կփլուզվի առաջին իսկ հարվածից։
