Վերջերս մամուլում լուր էր տարածվել, ըստ որի ԱԺ պատգամավոր Սամվել Ալեքսանյանի հերթական ձեռքբերումն Իտալիայում է՝ անշարժ գույքի տեսքով:
Իր նոր ձեռքբերման մասին լուրին ի պատասխան՝ պատգամավորը երեկ ԱԺ-ում հայտարարել էր, թե լրագրողներից նեղացել է, որ գրում են, թե ինքն իբր Իտալիայում տուն է գնել: Հարցին էլ, թե՝ չե՞ք գնել, պատախանել էր. «Չէ, ընդեղ ուրիշ բան ա եղել»:
Այն, որ օլիգարխ պատգամավորի հերթական ձեռքբերումը՝ տան տեսքով կարող է լինել նաև արտերկրում՝ զարմանալի չէ, քանի որ այսօր մեր փոքրիկ հանրապետությունում շատ քիչ բիզնեսներ են մնացել, որոնք չեն կապվում Ալեքսանյանի ընտանիքի հետ: Թե ինչ եղանակներով է նա իր գումարները վաստակել և օլիգարխ դարձել՝ դա արդեն հարցի մյուս՝ ցավալի կողմն է:
Իսկ թե ի՞նչ միջոցներով է Իտալիայում բնակարան ձեռք բերել ՀՀ մշակույթի նախարար Հասմիկ Պողոսյանը, ով նաև, ըստ ասեկոսեների, այնտեղ կազմակերպել էր իր տղայի հարսանեկան արարողությունը, հայտնի չէ:
Հարկ է նշել, որ նախարարը ժամանակին հայտնել էր, թե ինքը կողմնակի եկամուտ կամ որևէ բիզնես չունի, ավելին, անգամ նշել էր, որ իր ընտանիքը մասնավոր մեքենա չունի: Զարմանալին այն է, որ մեր երկրում աշխատավարձով ապրող մարդիկ լավագույն դեպքում ապրում են միջին պայմաններում, եթե չասենք, որ շատերը պարզապես գոյատևում են, իսկ նախարարի թույլ տված շռայլությունը նման պարագայում, իսկապես, ապշեցուցիչ է:
