Նախկին ազատամարտիկները որոշել են ԼՂՀ Մարտակերտի վարչական շրջանի Թալիշ սահմանամերձ գյուղի հարակից տարածքում հատուկ ինքնապաշտպանական սահմանապահական ավան հիմնադրել, ինչի առիթով էլ նամակ են գրել ՀՀ և ԼՂՀ կառավարություններին, պաշտպանության նախարարներին.
«Մենք(մոտ 300 հոգի) գնում ենք պաշտպանելու գյուղը, տնտեսությունը պետք է զարգանա, բնակիչները պետք է կարողանան գալ, ցերեկները աշխատել: Այն չպետք է կոչվի չեզոք գոտի, քանի որ այդ դեպքում կհամարվի հանձնված»,-լրագրողների հետ հանդիպման ժամանակ տեղեկացրեց «Թալիշ» հիմնադրամի հոգաբարձուների խորհրդի անդամ Էդուարդ Պոլատովը:
Նրա հաղորդմամբ՝ 2 օրից կլրանա նրանց ուղղված նամակի 1 ամիսը.
«Նամակում եղել է ծրագիրը միասին քննարկելու և իրականացնելու առաջարկ: Դեռևս պատասխան չենք ստացել: Հիմա ուզում եմ հարց տալ՝ իշխանավորնե՛ր, դուք մեզ հետ համագործակցելո՞ւ եք, թե՝ խանգարելու: Եթե արձագանք չլինի՝ արդեն կարող եմ մեղադրանք ներկայացնել, որ գյուղը ծախվել է»,-նկատեց Էդուարդ Պոլատովը:
Ծրագրի իրականացնողները նշեցին, որ իշխանությունների հետ բանակցությունների հաջորդ հարցը «Թալիշ» հիմնադրամում առկա գումարների տրամադրումն է այս ծրագրի իրականացման համար: Ի դեպ, արդեն մեկ միլիոն ութ հարյուր հազար դոլար Լոս Անջելեսից ուղարկվել է «Հայաստան» հիմնադրամին:
Անի Կարապետյան
