«Աստղադիտարանում իրականացվում են վաղուց սպասվող մի շարք փոփոխություններ.լուծվել է տրանսպորտի հարցը. ապահովված է աշխատակիցների տեղաշարժը Երևանից դեպի Բյուրական: Հաջորդը տեխնիկական հնարավորությունն է.աստղադիտակներ, հաշվողական տեխնիկա և չափիչ գործիքներ: 2 տարի առաջ սկսվեց մեծ դիտակի հայելու արդիականացումը, նորոգումը: «Ռոսկոսմոս»-ի հետ ենք համագործակցում»,-այսօր՝ լրագրողների հանդիպման ժամանակ խոսելով վերջին շրջանում Բյուրականի աստղադիտարանի կատարած աշխատանքների մասին՝ ասաց տնօրեն Հայկ Հարությունյանը:
Նրա խոսքով՝ հայ աստղագետները միշտ պահանջված են եղել, հիմա՝ նույնպես:
«Տարին 20-30 գործուղում է կազմակերպվում երկարատև կամ կարճատև աշխատելու համար, ուրախալի փաստ է, որ այստեղ նույնպես գալիս են աշխատելու.ունենք աշխատակից Կոլումբիայից, Իսպանիայից»,-ասաց Հայկ Հարությունյանը:
Աշխատակիցների կենցաղային պայմաններն ապահովելու համար սկսել են շինությունների վերանորոգումը.
«Միշտ երազել ենք այնպես լինի, որ Բյուրականի աստղադիտարանը էկոլոգիապես վնաս չտա, և օրինակ ջրատաքացուցիչները փոխարինեցինք արևային տաքացուցիչներով: Նախ էլեկտրականության ծախսերը մեզ համար պակասեցրինք, հետո՝ էներգոհամակարգի»:
Անդրադառնալով առաջիկայում Բյուրականի աստղադիատարանում սպասվող տնօրենի ընտրություններին՝ Հայկ Հարությունյանը նկատեց.
«Իմ այս կարգավիճակով երևի թե երբեք չենք հանդիպի, քանի որ Աստղադիտարանում նոր տնօրենի ընտրություններ են լինելու: Թեկնածություն չեմ դնելու, բավականին երկար ժամանակ եմ եղել ադմինիստրացիայում, իմ տարիքն էլ արդեն թույլ չի տալիս»:
Հայկ Հարությունյանը նշեց, որ կշարունակի աշխատել ոչ որպես վարչության անդամ, ոչ տնօրեն, կղեկավարի իր բաժինը:
Անի Կարապետյան
