Օրեր առաջ «Սլավմեդ» բժշկական կենտրոնում կատարվել է աննախադեպ վիրահատություն: 52-ամյա կնոջ որովայնից հեռացվել է 13կգ 170գրամ կշռող միոմատոզ փոփոխված հսկա արգանդը:
Վիրահատությունն առանձնահատուկ էր նաև նրանով, որ կատարվել է սիմուլտանտ վիրահատություն: Հիվանդի մոտ ախտորոշվել էր պորտային չներուղղվող մեծ ճողվածք, որովայնի առաջային պատի ուղիղ մկանների արտահայտված դիաստազ: Կատարվել է ճողվածքահատում, որովայնի առաջային պատի պրոթեզավորում պոլիպրոպիլենային ցանցով: Այս մասին տեղեկացնում է Առողջապահության նախարարության մամուլի ծառայությունը։
Նշենք, որ փոխվել էր օրգանիզմի ամբողջ անատոմիական կառուցվածքը և բժշկական կենտրոնի բուժանձնակազմի ջանքերով, ի դեմս՝ ծննդատան և գինեկոլոգիական ծառայության ղեկավար Վարդան Ռափյանի և ընդհանուր վիրաբուժության ծառայության ղեկավար Տիգրան Դուրգարյանի, հաջողվել է առանց բարդությունների ավարտել վիրահատությունը:
Հաշվի առնելով վերջին շրջանում կանանց մոտ նման դեպքերի տարածումը` հորդորում ենք ժամանակին դիմել բժշկի և հիշել, որ հիվանդության կանխարգելումն ավելի դյուրին է, քան բուժումը:
