Մամուլն այսօր գրել էր, թե աշխատանքի եւ սոցիալական հարցերի փոխնախարար Աշոտ Մարգարյանի պաշտոնանկության պատճառը Ֆեյսբուքում գրած ստատուսն է եղել՝ մանրամասնելով, որ «սահմանին լարվածության օրերին, երբ հայկական կողմը զոհեր ուներ, երիտասարդ փոխնախարարն իր էջում ինչ-որ թեստի արդյունք էր տեղադրել, թե ինչպես է պարել սովորել անձրեւի տակ։ Ստատուսը հասել է մինչեւ Բաղրամյան 26, որտեղից հրահանգել են դիմում գրել»։
Աշոտ Մարգարյանը ֆեյսբուքյան իր էջում արձագանքել է այս հրապարակմանը.
«Երբ ապրիլյան պատերազմի օրերին առաջնագծում էի, երբեք չէի մտածի, որ կգա մի օր ու իմ դեմ տարվող կեղտոտ լրատվական քարոզչության մեջ կօգտագործեն կենսագրությանս ամենամաքուր էջերից մեկը: Դուք ձեր գրածներին գոնե հավատու՞մ եք: Հասկանում եմ, որ փաստի առաջ եք կանգնել, հասարակությանը պետք է ուղորդեք, մի ձև տակից դուրս գաք: Գիտակցում եմ, որ մարդկանց համար առնվազն տարօրինակ է, երբ քաղաքական գործիչը կարող է պարզապես թողնել ու հեռանալ`առանց ավելորդ բաներ խոսելու: Բոլոր կեղտոտ մեկնաբանություններ ապահովող, կոնսպիրոլոգիաներ կերտող ու դիտումների հարց լուծող 'ուժերին' պարզապես կոչ եմ անում ունենալ չափի և բարոյականության սահման:
Ձեռքի հետ էլ կցում եմ այս նյութը, որ անծանոթ մարդիկ զերծ մնան մոլորեցնող հակաքարոզչությունից»,-գրել է նախկին փոխնախարարը:
Հետք.am-ի լուսանկարում՝ աջից՝ Աշոտ Մարգարյանը
