«Դուք այնպես վստահ էիք խոսում սպա ծեծող մարզպետների մասին, որ ես կարծում եմ՝ եթե ինֆորմացիա չունենայիք, վստահորեն այդպիսի պնդում չէիք անի: Ես մեծ հույս ունեմ, որ Դուք կկարողանաք նախաքննական մարմիններին Ձեր ցուցմունքներով նպաստել». հոկտեմբերի 1-ի նիստում, դիմելով «Լուսավոր Հայաստան» խմբակցության պատգամավոր Գևորգ Գորգիսյանին, ասաց ԱԺ նախագահ Արարատ Միրզոյանը: Նա այդ հայտարարությունն արեց տեղական ինքնակառավարմանը վերաբերող օրենսդրական փաթեթի քննարկման ժամանակ: Գ. Գորգիսյանը վերապահումներ ներկայացրեց փաթեթը ներկայացնող տարածքային կառավարման ենթակառուցվածքների նախարարի տեղակալ Վաչե Տերտերյանին: Նա նշեց, որ նախկին իշխանությունների օրոք մարզպետները եղել են ֆեոդալներ իրենց տեղերում և խառնվել են ընտրություններին:
«Օրենքով նրանց տրվել են լծակներ, որոնք փաստացի օգտագործվել են, որպեսզի մարզպետն ընտրովի գյուղապետի ու համայնքների բյուջեների վերաբերյալ պետի հետ խոսի որպես վերադաս: Օրինակ՝ մարզպետն առաջարկներ է ներկայացնում համայնքների բյուջեների հատկացումների, մշակութային միջոցառումների վերաբերյալ: Դա մտածված է արվել, որպեսզի մարզպետներն իշխանություններին ձայն բերեն: Այս փաթեթով մենք օրենքով առաջընթաց չենք արձանագրում»,- գնահատեց նա:
Դրան ի պատասխան՝ տարածքային կառավարման և ենթակառուցվածքների նախարարի տեղակալ Վաչե Տերտերյանը նշեց, որ օրենքով ուղիղ իմաստով մարզպետներին տրված լծակներ չկան: Ըստ նրա՝ մարզպետի պաշտոնը կարևոր է, և նա այո՜, պետք է իրավունք ունենա, պետությունից համայնքներին գումարների տրամադրման վերաբերյալ առաջարկ ներկայացնել:
«Ոչ միշտ է այնպես լինում, որ մարզպետը քաղաքական միջամտություն ունենա, եղել են դեպքեր, երբ համայնքն իր դիրքորոշումը հայտնել է, և հարցն այլ լուծում է ստացել»,-ասաց Վ. Տերտերյանը:
