«Ձմեռն իր ամբողջ ուժով ու խստությամբ վերադառնում է:Հունվարի 24-ից 27-ն ընկած ժամանակահատվածում օդի ջերմաստիճանը կնվազի 12-15 աստիճանով: Ամենացուրտ գիշերը կլինի հունվարի 27-ին, երբ լեռնային շրջաններում ջերմաստիճանը կիջնի մինչև -27, Արարատյան դաշտում՝ -16,-17, մայրաքաղաքում մինչև -16 աստիճան»,-այսօր՝ լրագրողների հետ հանդիպման ժամանակ տեղեկացրեց ՏԿԱԻՆ հիդրոմետ ծառայության օդերևութաբանության կենտրոնի պետի տեղակալ Գագիկ Սուրենյանը:

Նրա խոսքով՝ հունվարի 23-ի երեկոյան ժամերին և 24-ին  Հայաստանը կգտնվի ցիկլոնի տաք հատվածում.

«Լեռնային շրջաններում ձյուն կտեղա, իսկ հովտային շրջաններում տեղումները թաց ձյան տեսքով կլինեն: Հունվարի 24-ի երեկոյան ժամերին ցիկլոնի ցուրտ հատվածն է և Հանրապետությունում կներթափանցեն արկտիկական ցուրտ օդային հոսանքները, ուստի հունվարի 25-ին և  26-ին երկրի ողջ տարածքում տեղումները ձյան տեսքով կլինեն: Տեղումներն առատ կլինեն հունվարի 24-ին և 25-ին:  Շիրակում, Կոտայքում, Գեղարքունիքում, Արագածոտնի լեռնային գոտիներում, Վայոց Ձորի լեռնային հատվածներում ուժեղ բուք կլինի, տեսանելիությունը՝ ցածր, իսկ ճանապարհները մերկասառույցով կպատվեն»:

Ինչ վերաբերում է փետրվարին, ապա ՏԿԱԻՆ հիդրոմետ ծառայության օդերևութաբանության կենտրոնի պետի տեղակալի խոսքով՝ այն տաք, բայց տեղումնառատ է   լինելու.

«Ամսվա առաջին օրերին, երբ կներթափանցեն ցուրտ օդային հոսանքներ, Շիրակում, Կոտայքում, Գեղարքունիքում, Արագածոտնի և Վայոց Ձորի լեռնային շրջաններում գիշերային ժամերին օդի ջերմաստիճանը կիջնի  -18-ից -23 աստիճանով, սակայն ամսվա երկրորդ տասնօրյակում այս  մարզերում կլինի +5,+8 աստիճան:

Արարատյան դաշտում և մայրաքաղաքում չի բացառվում, որ առանձին օրերին ջերմաստիճանը նվազի մինչև -10,-15, իսկ  ամսվա երկրորդ կեսից հետո ցերեկային ժամերին ջերմաստիճանը կտատանվի +13-ից +15-ի սահմաններում»,-նշեց Գագիկ Սուրենյանը:

Անի Կարապետյան