Երևանի քաղաքապետարանում տեղի ունեցած ընդլայնված խորհրդակցության ժամանակ, որը վարել է քաղաքապետ Տարոն Մարգարյանը, ներկայացվել են Քաղաքաշինության և հողի վերահսկողության վարչության, ինչպես նաև Հասարակական կարգի պահպանության ծառայության 2015թ. կատարած աշխատանքները: Խորհրդակցությանը մասնակցել են վերոնշյալ օղակների բոլոր աշխատակիցները: Քաղաքապետ Տարոն Մարգարյանը հորդորել է լինել առավել հետևողական և պատասխանատու նշված ոլորտներում կանոնակարգված աշխատանք իրականացնելու հարցում.
     «Ձեզանից յուրաքանչյուրը պետք է հստակ գիտակցի, որ ձեր թերի աշխատանքի արդյունքում տուժում է Երևանի քաղաքապետարանի հեղինակությունը, ինչը թույլ չեմ տա որևէ մեկին: Ձեր ամենօրյա սրտացավ ու հետևողական աշխատանքով միայն կկարողանաք վայելել հանրության վստահությունը, ինչն էլ ձեր աշխատանքի ամենաարդարացի գնահատականն է լինելու: Եվ ուրեմն պահանջում եմ ձեզանից լինել հետևողական և անհանդուրժող ցանկացած ապօրինության հայտնաբերման և կանխման հարցում»: