ԱԱԾ տնօրենի ժամանակավոր պաշտոնակատար Էդուարդ Մարտիրոսյանը հերքեց, որ ԱԱԾ նախկին տնօրեն Արթուր Վանեցյանի նկատմամբ գործեր են նախապատրաստվում:
Լրագրողների դիտարկմանն՝ արդյոք Վանեցյանը չի՞ ձերբակալվելու ու նրա դեմ գործեր չկա՞ն, Մարտիրոսյանը բոլոր հարցերին բացասական պատասխան տվեց՝ պատասխանելով մեկ բառով. «Ո՛չ»:
Դիտարկմանը, թե Վանեցյանի հավանական ձերբակալման հետ կախված շատ լուրեր կան, Մարտիրոսյանն ասաց, որ հերքում է դրանք:
«Պետք չի այդպիսի ստահոդ լուրեր տարածել: Ի՞նչ ձերբակալելու մասին է խոսքը, ո՞վ է տարածում այդ լուրերը», - ասաց նա:
Խոսելով ԱԱԾ-ում անցկացվող ՊՎԾ ստուգումներին՝ Մարտիրոսյանն ասաց, որ դրանք կապ չունեն Վանեցյանի հետ ու պարզապես ՊՎԾ հերթական ստուգումներն են:
«ՊՎԾ-ն իր հերթական ստուգումներն է իրականացնում, առաջիկայում կլինի տեղեկատվություն, կտեսնեք: Արթուր Վանեցյանի հետ դա կապված չէ, ուղղակի ՊՎԾ-ն իր գործառույթների շրջանակներում մեր ֆինանսական գործողությունները մոտ 2 տարվա կտրվածքով ուսումնասիրում է», - ասաց նա:
