«Համավարակի այս շրջանում մենք ունեցանք մեկ վիդեո կոնֆերանս երկու նախարարների և համանախագահների մասնակցությամբ, և բացի այդ մենք մշտական կապի մեջ ենք համանախագահների հետ»։
Այս մասին այսօր ԱԺ-ում լրագրողների հետ զրույցում հայտնեց ԱԳ նախարար Զոհրաբ Մնացականյանը՝ անդրադառնալով այս փուլում ԼՂ հարցով բանակցային գործընթացին։ Մնացականյանը շեշտեց, որ հիմնական խնդիրը մնում է որևէ ռիսկի, էսկալացիայի բացառումը։
Ինչ վերաբերում է ՌԴ ԱԳ նախարար Սերգեյ Լավրովի հետ հեռախոսազրույցին, Մնացականյանը նշեց, որ Ռուսաստանի հետ երկկողմ բնույթի ընդարձակ օրակարգ կա, և արտաքին գործերի գերատեսչությունները ևս ունեն մեծ ծավալի օրակարգ, որը վերաբերում է բոլոր ուղղություններին․
«Մենք ունենք բավականին մեծ ծավալի համագործակցություն ՀԱՊԿ-ի, ԵԱՏՄ-ի, ԱՊՀ-ի շրջանակներում և այդ հեռախոսազրույցները տեղի են ունենում այն շրջանում, երբ մենք վիդեոկապի միջոցով անցկացնում էինք նախարարական հանդիպումներ»։ Խոսելով Ռուսաստանի տանիքի տակ գտնվող և Հայաստանի իրավապահների կողմից հետախուզվող նախկին բարձրաստիճան պաշտոնատար անձանց մասին՝ Մնացականյանն ասաց, որ սա դատաիրավական ոլորտի հարց է։
Նախարարի պնդմամբ՝ երկու երկրների հարաբերությունների հիմքում այն ռազմավարական և դաշնակցային գործընկերությունն է, որ վրա կառուցվում է երկխոսության և համագործակցության ամբողջ ծավալը, իսկ այդ հիմքը որևէ կերպ խարխլված չէ։ Արտաքին գործերի նախարարությունում կորոնավիրուսով երկու վարակված կա, հայտնեց նախարարը՝ հավելելով, որ կան նաև ինքնամեկուսացվածներ։ «Նախարարությունը փորձում է պահպանել բնականոն աշխատանքի հունը»,- ընդգծեց նա։
Դիտեք նաև՝
Դիտեք նաև՝
