«Եթե ուզում ենք ունենալ ազատ, անկախ ինքնակառավարվող, ֆինանսական անկախությունն ունեցող համայնքներ, մենք պետք է վերացնենք մարզպետի ինստիտուտը». հոկտեմբերի 1-ին նման հայտարարությամբ հանդես եկավ ԱԺ «Լուսավոր Հայաստան» խմբակցության պատգամավոր Անի Սամսոնյանը՝ տեղական ինքնակառավարմանը վերաբերող օրենսդրական փաթեթի քննարկման ժամանակ:
Ա. Սամսոնյանը մարզպետի ինստիտուտին քաղաքական դեսանտի ինստիտուտ որակումը տվեց՝ հիմնավորելով, որ տարիներ շարունակ մարզպետները պարտադրել են համայնքների ղեկավարներ ընտրել: Համայնքներն ընտրել են: «Եվ այդպես համայնքապետերի միջոցով մարզպետները եղել են ՀՀ-ի մարզերում քաղաքական դրության տերը: Շատ երևույթներ դեռ շարունակվում են, և շարունակվում են նաև այս ինստիտուտի քաղաքական վերահսկողության գործառույթները»,- ասաց նա:
Նրա գնահատմամբ՝ օրինագծի ընդունումն արդեն ուշացած է, որովհետև ՀՀ նախագահի հրամանագիրը, որը պետք է ապահովեր մարզպետների՝ համայնքների գլխին մահակ չլինելը, ուժը կորցրած է համարվել ապրիլի 4-ին:
«Թեպետ Սահմանադրությամբ ամրագրված է եղել մարզպետի ինստիտուտը, սակայն որևէ օրենքով ամրագրված չեն եղել մարզպետի իրավունքները: Կարող ենք ասել, որ մարզպետների գործողությունները, կարգադրություններն ու հրամաններն ապօրինի են: Օրինագծի ուշացմամբ կառավարությունը իրավական անվտանգության խնդիր է ստեղծել»,- հայտարարեց «Լուսավոր Հայաստանի» ներկայացուցիչը:
Տարածքային համաչափ զարգացման համատեքստում էլ նա առաջարկեց վերացնել մարզպետի ինստիտուտը:
«Այս միջնորդ օղակը մահակ է դարձել համայնքների ղեկավարների գլխին: Պետք է վերացնել կառավարման սուբյեկտին, որպեսզի օբյեկտը դառնա անկախ դառնալ»,-նշեց Ա. Սամսոնյանը:
