«Երբ նայում ես, թե ինչ է կատարվում աշխարհում և ինչ է կատարվում Հայաստանում, տեսնում ես, որ չի համընկնում ինչ-որ մի բան»,- մամուլի ասուլիսին հայտարարեց Հանրային խորհրդի նախագահ Վազգեն Մանուկյանը։
«Աշխարհում նոր իրավիճակ է ստեղծվել, այն համընդհանուր ինտեգրացիայի պայմանները փոխվել են նոր պայմաններին։ Բոլոր պետությունների ներսում գլուխ են բարձրացնում այն ուժերը, որոնք ազգային են, պետականամետ են», - ասաց նա՝ հավելելով, որ տարածաշրջանում հսկայական փոփոխություններ են տեղի ունենում և Ռուսաստանի դերակատարությունը տարածաշրջանում կտրուկ բարձրացել է։
«Այս պայմանները չեն համընկնում նախորդ իրավիճակի հետ, աշխարհը մի նոր փուլի մեջ է մտնում։ Թվում էր, թե մենք դրա հիման վրա պետք է կառուցեինք մեր քաղաքականությունը, որովհետև սկսում են նոր ժամանակներ, նոր մարտահրավերներ, նոր վտանգներ և նոր հնարավորություններ», - ասաց Վազգեն Մանուկյանը՝ ներքաղաքական իրավիճակին տալով հետևյալ գնահատականը․
«Անկեղծ ասած՝ մեր հասարակությանը այսպես բզկտված դեռ չէի տեսել։ Իրար նկատմամբ թույնով լցված, մատնություններ անել, արժեքավոր մարդկանց նկատմամբ քրեական գործեր հարուցել...Արցախի պաշտպանության նախարարին են հանում, իրենց կարծիքով ինչ-որ մի նախադասություն ճիշտ չի ասել, որը լավագույն նախարարներից էր։ Անարժեք մարդիկ հետապնդում են այս պետության համար մեծ արժեքներ ստեղծած մարդկանց»։
Նյութի աղբյուրը՝ 24news.am
