Ադրբեջանում շարունակվում է մանաթի արժեզրկման հետեւանքով աննախադեպ թանկացումների դեմ զանգվածային բողոքի ակցիաների մասնակիցների եւ ընդդիմադիրների ձերբակալությունները:
«Մուսավաթ» կուսակցության հյուսիսային տարածաշրջանի գծով համակարգող Մարդան Մեհթին հունվարի 16-ին կանչվել է Սիյազանի շրջանային ոստիկանություն եւ ձերբակալվել: Նրան ոստիկանություն են կանչել` կապված այդ շրջկենտրոնում երկու օր առաջ տեղի ունեցած զանգվածային բողոքի ակցիաների հետ:
«Մուսավաթ» կուսակցության աշխատակազմի ղեկավար Գյուլաղա Ասլանլըն գործակալությանը հայտնել է, որ ընդդիմադիրը ոստիկանություն էր գնացել իր ազգականի հետ, որին կարճ ժամանակ անց հաղորդել են, որ Մարդանը ձերբակալվել է` չներկայացնելով որեւէ բացատրություն:
Այսպիսով, երկու օր առաջ թանկացումներիմ դեմ բողոքի ակցիաների պատճառով ոստիկանության կողմից ձերբակալված ընդդիմադիրների թիվը կազմել է 10 մարդ: Բողոքի ակցիաներում ձերբակալվածների ընդհանուր թիվը գերազանցում է 60-ը, հաղորդում է «Թուրան»-ը:
