Լրացավ Արցախյան ազատամարտի մասնակից, Հայաստանի ազգային հերոս Թաթուլ Կրպեյանի ծննդյան 50-ամյակը:Տարեդարձի առթիվ հիշատակի և ոգեկոչման միջոցառում կազմակերպվեց նրա հայրենի գյուղում, որն այժմ կրում է հերոսի անունը:
«Նրա շիրիմի մոտ էինք, երբ մի հզոր արծիվ թևածեց շիրմաքարի մոտ՝ գրավելով բոլորիս ուշադրությունը: Եվ մենք հասկացանք, որ նրա ու մյուս ազգային հերոսների հոգիները միշտ մեզ հետ են»,-այսօր՝ լրագրողների հետ հանդիպման ժամանակ ասաց նրա քույրը՝ Ռուզաննա Կրպեյանը:
Ազգային հերոսի քրոջ խոսքով՝ Թաթուլին նվիրում ու հաղթանակ է տվել պապերի արյան կանչը, որոնք գաղթել էին Արևմտյան Հայաստանից:
«Թաթուլի մանկության հեքիաթները տատիս պատմած գաղթի պատմություններն էին: Նա ասում էր՝ գնանք հասնենք մինչև Մասիս ու այն էլ տուն բերենք: Շատ բանաստեղծություններ ունի՝ Հայոց ցեղասպանության վերաբերյալ: Գրել է 1984 թվականին:
Կաղնին ընկավ շառաչելով,
Ձայնից ուժգին զարթնա ես,
Վարպետ, ասի, էս ի՞նչ ցավ էր,
Էս ի՞նչ վիշտ է պատել մեզ:
***
Ես պարում էի,
Քամին ինձ հետ,
Մենք կարծես մի մոր զավակ լինեինք
Ես պարում էի,
Ես՝ քամին հպարտ:
Քամու հպարտության հետ իր հպարտությունն ու նվիրումն էր Հայրենիքին»,-նկատեց Ռուզաննան:
Լրացնելով նրա խոսքը՝ «Վարդանանք» ռազմահայրենասիրական կենտրոնի նախագահ Սաթենիկ Աբրահամյանը հավելեց.
«Հայրենասեր ասելը շատ քիչ է, ինքը նաև ազգագրագետ է: Ուներ համախոհների խումբ, որոնք ազգային երգ ու պարի կրողներն էին նույնպես»:
Ազգային-ազատագրական պայքարի նվիրյալ, պատմաբան, ՀՀ ազգային հերոս Թաթուլ Կրպեյանը ծնվել է 1965թ. ապրիլի 21-ին Արեգ գյուղում (Թալինի շրջան, Արագածոտնի մարզ, ՀՀ): 1984-1985թթ. ծառայել է ԽՍՀՄ ԶՈՒ-ում: 1987-1990թթ. սովորել է Երևանի պետական համալսարանի պատմության ֆակուլտետում: 1987թ. աշնանից անդամագրվել է «Միացում» կազմակերպությանը: 1990թ. սեպտեմբերից պատմության ուսուցիչ է աշխատել Գետաշենի դպրոցում: Եղել է Գետաշեն-Մարտունաշեն ենթաշրջանի ինքնապաշտպանության հրամանատարը: 1991թ. ապրիլին ադրբեջանցի հրոսակները և խորհրդային զորքերը սկսել են Կոլցո գործողությունը, որի նպատակը Գետաշենի ենթաշրջանի հայության բռնի տեղահանումն էր: Թաթուլը պատանդ է վերցրել այդ գործողության ղեկավար ԽՍՀՄ ՆԳՆ ներքին զորքերի Բաքվի գնդի հրամանատար գնդապետ Մաշկովին:Զոհվել է 1991թ. ապրիլի 30-ին Գետաշենում:
Անի Կարապետյան
