Երևանում ընթացող ՆԱՏՕ-ի խորհրդարանական վեհաժողովի 108-րդ Ռոուզ-Ռոթ սեմինարի ժամանակ ՀՀ ԱԺ փոխնախագահ Ռուբեն Ռուբինյանն իր ելույթում ողջունել է ադրբեջանցի Մուրադովի մասնակցությունը ժողովին։ «Այս տարվա օգոստոսի 8-ին այդ թվում հենց այս համատեքստում Վաշինգտոնում կայացած գագաթնաժողովում Հայաստանի վարչապետը և Ադրբեջանիի նախագահը ԱՄՆ նախագահի աջակցությամբ և վկայությամբ ստորագրեցին համատեղ հռչակագիր խաղաղության մասին։ Սա պատմական քայլ է դեպի կայուն ու երկարատև խաղաղությանուն մեր տարածաշրջանում։ Կարծում եմ՝ պարոն Մուրադովի ներկայությունը այստեղ ևս մեկ առհավատչյա է դրա և, բնականաբար, ողջունում ենք դա, և հույս ունենք, որ համաձայնագիրը կստորագրվի ու կվավերացվի հնարավորինս սեղմ ժամկետում»,-ասել է Ռուբեն Ռուբինյանը։ «Այսօր մենք ունենք պատմական հնարավորություն՝ հաղթահարելու անցյալի հակամարտություններն ու կառուցելու խաղաղ, բարիդրացիական ապագա։ Մեր պարտքն է չկորցնել այդ հնարավորությունը և այն վերածել կայունության ու զարգացման պատմական իրականության»,- նշել է ԱԺ փոխնախագահը։

***

ԱԱԾ տնօրեն Անդրանիկ Սիմոնյանը երեկ Բաքվից վերադարձել է Երևան։ Լրագրողներն այսօր փորձեցին մանրամասներ ճշտել ԱԽ քարտուղար Արմեն Գրիգորյանից, ով խուսափեց ուղիղ պատասխաններ տալուց՝ նշելով, որ ԱԱԾ-ն կխոսի, եթե անհրաժեշտություն լինի։

Հարցին՝ հնարավո՞ր է, որ ինքն էլ այցելի Բաքու՝ Գրիգորյանն ասաց. «Այդպիսի որևէ քննարկում չկա»։

***

44-օրյա պատերազմի հանգամանքներն ուսումնասիրող քննիչ հանձնաժողովի զեկուցը ժամանակին է ուղարկվել ԱԺ նախագահին, ժամկետի խախտում չի եղել։ Այս մասին լրագրողներ հետ զրույցում հայտնեց ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը․ «Մենք ծավալուն եզրակացություն ենք տվել, հսկայական գաղտնի նյութեր են ուսումնասիրվել․․․ Զեկույցը տալիս է շատ հարցերի պատասխան։ նՀետևանքներ հիմա էլ կան, իրավապահները բազմաթիվ գործեր են քննում։ ԱԺ նախագահը կորոշի հրապարակման օրը։ Մեծ բացահայտումներ, այո՛, կլինեն, այնպիսի՜ լույսեր կսփռվեն»,- ասաց Քոչարյանը։

***

«Մենք հույս ունենք, որ Թուրքիան կպատասխանի մեր պատրաստակամությանը՝ որքան հնարավոր է շուտ հաստատել դիվանագիտական հարաբերություններ և ունենալ բաց սահմաններ։ Մենք դրան պատրաստ ենք հենց այսօր»,- ՆԱՏՕ-ի ԽՎ-ի քննարկումների ժամանակ հայտարարել է ՀՀ ԱԺ փոխնախագահ Ռուբեն Ռուբինյանը՝ խոսելով Թուրքիայի հետ հարաբերությունների կարգավորման մասին։ «Տասնամյակներ շարունակ Հայաստանի անվտանգության ռազմավարությունը կախված է եղել միայն մեկ բևեռից, ինչը բազմաթիվ խնդիրներ է ստեղծել մեզ համար։ Ներկայում մենք աշխատում ենք դրա դիֆերենցիկացման ուղղությամբ, որը ենթադրում է հարաբերությունների կարգավորում հարևանների հետ, բարիդրացիական հարաբերություններ և համագործակցություն՝ բոլոր կողմերի հետ»,- ասել է Ռուբեն Ռուբինյանը։

***

Երևանում սեպտեմբերի 22-ին մեկնարկել է ՆԱՏՕ ԽՎ 108-րդ Ռոուզ-Ռոթ սեմինարի աշխատանքը: ԱԺ կայքում հրապարակվել է ՆԱՏՕ ԽՎ-ում ՀՀ ԱԺ պատվիրակության ղեկավար, ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի ելույթը, որում մասնավորապես ասված է․ «Հատկանշական է, որ այս սեմինարը Հայաստանում անցկացվում է մի փուլում, երբ տարածաշրջանային բարդ և բազմաշերտ զարգացումները, առավել քան երբևէ, ունեն միջազգային աջակցության, փորձի փոխանակման և քաղաքական կամքի դրսևորման կարիք:

Հետևաբար, նպատակային է նաև այս օրերին մեր ուշադրության կենտրոնում գտնվելիք թեմաների ընտրությունը. խաղաղության գործընթացը Հայաստանի և Ադրբեջանի միջև, տարածաշրջանային աշխարհաքաղաքական մրցակցությունը,
ժողովրդավարության դիմակայունությունը,
հիբրիդային սպառնալիքները և ապատեղեկատվությունը,
տարածաշրջանային տնտեսական համագործակցություն:

․․․Հայաստանի և Ադրբեջանի միջև խաղաղության հաստատման գործընթացը ոչ միայն ազգային, տարածաշրջանային, այլև գլոբալ անվտանգության առաջնահերթություններից է: Մենք հավատում ենք, որ հնարավոր է հասնել ինքնիշխանության, տարածքային ամբողջականության, սահմանների անխախտելիության, իրավազորության և փոխադարձության սկզբունքների վրա հիմնված կայուն խաղաղության: Այս գործընթացի իրականացումը ոչ միայն երկկողմ հարաբերությունների վերականգնման երաշխիքն է, այլև տարածաշրջանի փոխակերպման նոր հնարավորություն:
Այս համատեքստում Հայաստանի ներկայացրած «Խաղաղության խաչմերուկ» ռազմավարական տեսլականը ներդաշնակվում է հռչակագրի դրույթներին՝ առաջարկելով տրանսպորտային եւ ենթակառուցվածքային կապերի վերաակտիվացում, տնտեսական փոխկապակցվածություն ու վստահություն:

․․․Միևնույն ժամանակ, մենք չենք կարող անտեսել գլոբալ աշխարհաքաղաքական փոփոխությունները, որոնք ձևավորում են նոր իրողություններ՝ նոր անվտանգային մարտահրավերներով և մրցակցային օրակարգով: Այս փոփոխությունները ոչ միայն համարժեք արձագանք են պահանջում, այլև միջազգային անվտանգության ճարտարապետության մեջ առավել խոր ինտեգրում:

Այս համատեքստում, հատկապես, ցանկանում եմ ընդգծել Հայաստան-ՆԱՏՕ գործընկերության առանցքային դերը: Հայաստանի և ՆԱՏՕ-ի միջև հարաբերություններն ավելի քան 30 տարվա պատմություն ունեն: Երկկողմ համագործակցության սկիզբը դրվել է 1994 թվականին:
․․․Մեր համագործակցությունը հիմնված է համընդհանուր արժեքների՝ ժողովրդավարության, անվտանգության, մարդու իրավունքների պաշտպանության և իրավունքի գերակայության վրա: Հայաստանը բարձր է գնահատում այս համագործակցությունը՝ այն դիտարկելով ոչ միայն որպես պաշտպանական, այլև՝ համակարգային բարեփոխումների հարթակ, որը նպաստում է մեր երկրի անկախության ամրապնդմանը և ինստիտուցիոնալ դիմակայունությանը:

Այս հարաբերությունները հատկապես մեծ կարևորություն են ստանում այսօրվա բազմաբևեռ, անկանխատեսելի և հաճախ էլ՝ անկայուն աշխարհում՝ դառնալով անվտանգության և կայուն զարգացման կարևոր հենասյուն:

․․․Մենք հավատում ենք, որ Հարավային Կովկասը կարող է և պետք է դառնա ոչ թե բաժանարար գծերի, այլ՝ միացնող կամուրջների տարածաշրջան՝ հիմնված փոխշահավետ համագործակցության վրա․․․»: